Pinayuhan ni Catholic Bishops Conference of the Philippines (CBCP) Caritas Philippines Episcopal Commission on Social Action, Justice & Peace (ECSA-JP) President Bishop Gerardo Alminaza ang mga pamilya ng mga biktima ng drug war na magpakatatag at lakasan ang loob, kasabay ng nakatakdang pagsisimula ng confirmation of charges hearing laban kay dating Pangulong Rodrigo Duterte ngayong Pebrero 23.
Sa misang ginanap sa Our Lady of Remedies Church sa Malate, Maynila, na pinangunahan ni Bishop Alminaza para sa mga biktima, hinimok niya ang mga pamilya na manatiling matibay habang gumugulong ang proseso ng hustisiya para sa kanilang mga mahal sa buhay.
Aniya, mahalagang manindigan ang mga pamilya sa pagsasabi ng katotohanan tungkol sa nangyari sa ilalim ng kontrobersyal na drug war. Dagdag pa ng obispo, kailangan nila ng sapat na lakas ng loob dahil sa patuloy na pananakot at pangungutya—marami sa mga ito ay nagmumula sa mga tagasuporta ng dating pangulo.
Nag-alay din ng panalangin si Bishop Alminaza para sa mga biktima, umaasang mabibigyan ang kanilang pamilya ng lakas upang harapin at tanggapin ang anumang magiging resulta ng pagdinig.
***
Naniniwala si Navotas Rep. Toby Tiangco na ang ikaapat na impeachment complaint laban kay VP Sara Duterte ay bilang reaction ng kaniyang mga kritiko laban sa kaniyang pag-anunsyo na tatakbo siya sa pagkapangulo sa 2028.
Kung babalikan noong umaga ng Pebrero-19, nag-anunsyo si VP Sara na siya ay kakandidato sa pagkapangulo sa susunod na general elections.
Kinahapunan, inihain na ang ika-apat na impeachment complaint laban sa kaniya kung saan nagsilbing sponsor sina Deputy Speaker Paolo Ortega at Manila Rep. Bienvenido Abante Jr., dalawa sa mga pangunahing kritiko ng pangalawang pangulo.
Sa isang panayam, sinabi ni Tiangco na ang huling complaint ay posibleng reaction lamang sa naunang announcement ni VP Sara dahil ito ang nagsisilbing pinakamabigat na reklamo.
**
Agad nilinaw ng Quezon City local government na wala silang tinanggihang permit para sa mga pagtitipon sa Pebrero 25, kasabay ng ika-40 anibersaryo ng People Power Revolution.
Ayon kay Retired Gen. Elmo San Diego, hepe ng QC Department of Public Order and Safety (DPOS), binigyan ng permiso ang pagtatayo ng common stage sa People Power Monument na inorganisa ng Trillion Pesos March Movement.
Gayunman, may ilang grupo na tumangging sumama sa iisang programa at mas piniling magsagawa ng hiwalay na kilos-protesta sa EDSA Shrine.
Ipinaliwanag ni San Diego na hindi sakop ng Quezon City ang EDSA Shrine kaya ang pagbibigay ng permiso ay nakadepende sa Mandaluyong LGU at Eastern Police District.