Nagdesisyon ang gobyerno ng Japan na mas palawigin pa ang pag-alis ng sanction laban sa Syria sa pamamagitan ng pag-alis ng mga babala at restrictions sa 16 na organisasyon doon.
Ayon kay Chief Cabinet Secretary Minoru Kihara, layunin ng hakbang na ito na suportahan ang rebuilding at reconstruction ng Syria matapos ang pagbagsak ng rehimen ni dating Pangulong Bashar al-Assad noong 2024.
Binigyang-diin ni Kihara na ang katatagan at pag-unlad ng Syria ay may direktang epekto sa pangkalahatang kapayapaan sa buong Middle East, kaya mahalagang matulungan ang mga kinauukulang grupo sa kani-kanilang mga tungkulin sa muling pagbangon ng bansa.
Sa kabila ng panibagong hakbang na ito, nananatili pa ring may umiiral na sanksyon ang Japan laban sa 59 na indibidwal at 15 organisasyon sa Syria.
Ang hakbang ng Japan ay kasunod din ng kaparehong mga desisyon ng United States at European Union na mag-alis ng sanksyon bilang suporta sa political transition at muling pagtataguyod ng Syria.
---
Hindi bababa sa 33 katao ang nasawi habang 36 ang nasugatan matapos magsagawa ng airstrike ang militar ng Myanmar malapit sa isang pamilihan sa Kyauktaw, Rakhine State nitong Lunes, Setyembre 28.
Ayon sa pahayag ng Arakan Army, dalawang bomba ang ibinagsak ng isang fighter jet bandang tanghali malapit sa pamilihan kung saan kabilang sa mga nasawi ang mga tindero, mamimili, at mga kalapit na residente.
Kinumpirma rin ng rescue official na si Wai Hun Aung ang bilang ng mga biktima at sinabing ang naturang lugar ay isa sa mga pangunahing wholesale center na dinarayo ng mga negosyante sa buong rehiyon.
Nagbabala ang Arakan Army na maaari pang tumaas ang bilang ng mga namatay habang patuloy ang retrieval at rescue operations sa gumuhong pamilihan.
Wala pang inilalabas na opisyal na pahayag ang militar ng Myanmar kaugnay ng insidente, bagama’t dati nitong iginigiit na lehitimong military targets lamang ang kanilang inaatake.
Patuloy ang matinding labanan at kaguluhan sa Myanmar matapos ang ginawang military coup noong 2021, kung saan nakikipaglaban ang pamahalaang militar sa iba’t ibang armadong grupo kabilang ang Arakan Army.