Kampante ang Department of Agriculture (DA) sa kasapatan ng supply ng pagkain sa buong bansa, sa kabila pa ng patuloy na paghina ng piso kontra dolyar atbpang foreign currencies.
Maalalang ngayong lingo ay tuluyang pumalo sa mahigit P64 ang isang dolyar ngunit bahagya namang nakabawi sa pagtatapos ng trading ngayong Biyernes, Oct. 30.
Ayon kay DA Spokesperson Assistant Secretary Arnel De Mesa, sapat ang imbak ng bansa sa mga pangunahing bilihin hanggang sa pagtatapos ng taong 2026.
Ito ay parehong mula sa suporta ng mga lokal na magsasaka at mula sa mga imported o inangkat na produkto mula sa iba’t-ibang bansa.
Ayon pa kay De Mesa, tama lamang ang naunang sinabi ni Pangulong Ferdinand R. Marcos Jr. na hindi kailangang mag-panic dahil sapat ang suplay ng pagkain para sa lahat.
Kaisa ng kasalukuyang administrasyon aniya, ginagawa rin ng DA ang lahat ng pamamaraan upang salagin ang epekto ng paghina ng piso kontra dolyar.
Sa ngayon, naghahanda rin ang DA ng mga maitutulong sa mga lokal na magsasaka na labis na maaapektuhan sa impact nito, at ng iba pang mga kasalukuyang problema tulad ng tumitinding El Nino phenomenon.
---
Naitalaga bilang opisyal na Chief Minister ng Bangsamoro Autonomous Region in Muslim Mindanao (BARMM) si Abdulraof “Sammy Gambar” Macacua matapos makakuha ng 51 boto sa ginanap na halalan sa parliyamento ngayong Biyernes, Oktubre 30, 2026.
Ang makasaysayang halalang ito ang nagtatapos sa pitong taong transition governance, na nagmamarka sa pormal na paglipat mula sa itinatalagang interim authority, ang Bangsamoro Transition Authority (BTA), tungo sa isang regular at demokratikong inihalal na rehiyonal na pamahalaan, alinsunod sa Bangsamoro Organic Law (BOL) (Republic Act No. 11054).
Ang Bangsamoro Organic Law, na niratipika noong 2019, ang nagtatag sa BARMM bilang bunga ng mga dekada ng negosasyong pangkapayapaan sa pagitan ng pamahalaan ng Pilipinas at ng Moro Islamic Liberation Front (MILF), na naglalayong magbigay ng mas malawak na awtonomiya at sariling pagpapasya sa mga mamamayang Bangsamoro.
Tinalo ni Macacua mula sa Bangsamoro Federalist Party (BFP) si dating interim chief minister Ahod “Al Haj Murad” Ebrahim na nakakuha lamang ng 27 boto mula sa 80-member Bangsamoro Parliament.
Si Macacua, isang mahalagang pigura sa prosesong pangkapayapaan, ay dating chief of staff ng Bangsamoro Islamic Armed Forces (BIAF) ng Moro Islamic Liberation Front (MILF), at kumakatawan sa 3rd parliamentary district ng Maguindanao del Norte, nagsilbi rin siyang interim chief minister at acting provincial governor.
Si Ebrahim, bilang unang interim Chief Minister, ay gumanap ng mahalagang papel sa pamumuno sa Bangsamoro Transition Authority (BTA) mula nang ito ay maitatag, na nangasiwa sa mga paunang yugto ng pagtatatag ng institusyon at pagpapatupad ng kasunduang pangkapayapaan.
Dumalo sa ginanap na inaugurasyon ang mga opisyal ng pambansang pamahalaan, mga gobernador, peace advocates, at mga dayuhang diplomat upang saksihan ang pormal na pag-upo ng mga regular na miyembro ng parliyamento.
Samantala, nagpatupad naman ang pulisya at militar ng heightened security sa Cotabato City para sa naturang okasyon na nagdulot ng pansamantalang limitasyon sa paggalaw at negosyo ng mga residente.
---
Inihayag ng Malacañang na malaki ang naging epekto ng P50-milyong pabuya sa kakayahan ni Senador Ronald “Bato” Dela Rosa na malayang makakilos nang hindi napapansin, kasabay ng pinaigting na operasyon ng pulisya at pagtaas ng kamalayan ng publiko.
Batay sa ulat ng Philippine National Police, maingat na sinusuri ang lahat ng impormasyong natatanggap at agad na tinutugunan ang mga mapagkakatiwalaang lead.
Tumanggi naman ang Palasyo magbigay ng detalye hinggil sa kinaroroonan at operasyon laban sa senador upang hindi malagay sa panganib ang mga impormante at mga tauhan ng pulisya.
Nahaharap si Dela Rosa sa arrest warrant ng International Criminal Court dahil sa kasong crimes against humanity kaugnay ng kampanya kontra ilegal na droga ng administrasyon ni dating Pangulong Rodrigo Duterte.
Nagtago siya matapos kumpirmahin ni Ombudsman Jesus Crispin Remulla noong huling bahagi ng 2025 na may warrant laban sa senador.
Noong Mayo, muling nagpakita si Dela Rosa sa Senado upang suportahan ang pagkakatalaga kay Senador Alan Peter Cayetano bilang Senate President, ngunit hindi siya naaresto at kalauna’y nakalabas sa gusali sa kabila ng pagbabantay ng mga pulis.
Inamin naman ni Interior Secretary Jonvic Remulla ngayong buwan na nagkulang siya sa pag-asikaso sa pag-aresto sa senador dahil labis siyang umasa sa isang gentleman’s agreement.