Pinalawak ang umiiral na ceasefire sa buong rehiyon ng Kherson sa southern Ukraine upang maghatid ng pagkain at gamot sa pinaliligirang lungsod ng Oleshky na kasalukuyang nasa ilalim ng kontrol ng mga pwersang Russian.
Tinatayang dalawang libong residente ang nakakulong sa naturang lungsod nang walang supply ng kuryente, tubig, at pagkain matapos masira ang Kakhovka Dam noong 2023 at mapalibutan ng mga landmine ang lahat ng daanan.
Isinagawa ang pagpapalawak ng kasunduan sa pamamagitan nina US First Lady Melania Trump at Pope Leo XIV upang magbigay ng safe passage sa mga humanitarian convoy hanggang sa Nobyembre 1.
Inihayag ng magkabilang panig na sinusunod ang kasunduan, kung saan tinawag ito ni David Arakhamia mula sa parlamento ng Ukraine na pinakamalaking de-escalation sa sigalot simula noong taong 2022.
Nagsimula na ang engineering reconnaissance at pag-aalis ng mga explosive device ng mga militar upang maihatid ang mga tulong sa Huwebes at maisagawa ang pormal na evacuation sa Biyernes.
Samantala, nagbabala si Ukrainian President Volodymyr Zelensky ukol sa seguridad ng mga mamamayan habang patuloy na kinukumpuni ang mga ruta kung saan nawasak din ang mga tulay sa kahabaan ng Dnipro River.
---
Lumobo na sa 10,000 ang kumpirmadong kaso ng Ebola virus sa Democratic Republic of Congo, ayon sa pamahalaan nito ngayong Martes, Oktubre 27.
Habang patuloy na kinokontra ng pamahalaan ng Congo ang patuloy na pagdami ng mga nahahawa, naitala sa kasaysayan ang pinakamabilis na pagdami ng mga nagkaksakit nito na umabot sa 10,060 na kaso, ayon sa Ministry of Health nito.
Batay pa sa datos, halos kalahati ng mga kumpirmadong kaso anila ang nasawi sa nasabing sakit, kung saan naitala rin ang pinakamalubhang outbreak ng nasabing virus sa kasaysayan ng Congo.
Ang nasabing outbreak na nagsimula nitong Mayo ng taon ay dulot ng pambihirang Bundibugyo virus, isang variant ng Ebola na wala pang kaakibat na bakuna o pangontra.
Bagama’t patuloy na tinutugunan ng Congo ang pagdami ng kaso ng virus, tila hirap nitong labanan ang paglaganap ng sakit bunsod ng ilan pang mga suliraning kinahaharap ng bansa tulad ng masamang kalagayan ng mga kalsada nito, mga ulat ng armadong tensyon, at maging ang misinformation.
Mula sa tatlong probinsya ng Congo, umabot sa walong probinsya ang apektado ng nasabing sakit kung saan lumaganap ito sa 66 health zones.
Dagdag pa nito, kumalat na rin sa ilang rehiyon ng kontinente ng Africa ang aktibong kaso ng mga nagkakasakit kung saan naitala na rin ang pagkahawa ng ilan sa Nigeria at Kenya.