Nanawagan si Pope Leo XIV na wakasan na ang karahasan sa Yemen, dalawang linggo matapos siyang sumailalim sa operasyon sa baga.
Ayon sa Santo Papa, kabilang sa kanyang pangunahing ikinababahala ang makataong krisis sa lungsod ng Taiz sa timog-kanlurang bahagi ng Yemen, kung saan naghihirap ang mga mamamayan dahil sa kakulangan ng pagkain, malinis na tubig, at serbisyong medikal.
Umapela rin ang Santo Papa na itigil na ang mga labanan upang makapamuhay nang mapayapa ang mga mamamayan sa Yemen at sa iba pang bahagi ng rehiyon.
Samantala, ipinagdasal din ni Pope Leo XIV ang mga nasawi at nasugatan sa umano’y pag-atake ng mga terorista sa Hamound Church sa Jordan noong Biyernes.
Matatandaang sumailalim sa operasyon si Pope Leo noong Oktubre 13, kung saan tinanggal ang ibabang bahagi ng kanang baga matapos siyang masuring may adenocarcinoma, isang uri ng kanser sa baga.
Ayon sa mga doktor ng Santo Papa, hindi na niya kailangang sumailalim sa karagdagang therapy dahil hindi kumalat sa ibang bahagi ng kanyang katawan ang tumor.
---
Muling naitalaga bilang pangulo ng Brazil ang beteranong lider na si Luiz Inácio Lula da Silva matapos talunin ang kaniyang katunggali sa kanan na si Flávio Bolsonaro sa isang mahigpit na run-off election.
Ito ang ikaapat na pagkapanalo ni Lula sa pagkapangulo, kung saan nagawa niyang baligtarin ang resulta mula sa unang ikot ng halalan at labanan ang trend ng pag-usbong ng mga pamahalaang pakanan sa Latin America.
Nakatakdang magsimula ang kaniyang bagong termino sa Enero 5, 2027 sa gitna ng mga hamong pampolitika sa loob at labas ng bansa, kabilang ang malamig na pakikitungo mula sa administrasyon ni US President Donald Trump.
Bagamat mas ninais ng Washington ang isang kaalyadong lider upang pigilan ang lumalawak na impluwensya ng China, ikinatuwa naman ng mga pangkat-pangkalikasan ang tagumpay ni Lula para sa proteksyon ng kagubatan ng Amazon.
Gayunman, nananatiling hati ang bansa matapos makakuha si Bolsonaro ng mahigit 48 porsiyento ng mga boto kasabay ng pagdomina ng kaniyang Liberal Party sa Kongreso ng Brazil.
Sa kabila nito, nangako si Lula na magpapatupad ng panibagong paraan ng pamamahala upang pag-isahin ang nahating mamamayan at tiyakin ang katarungang panlipunan para sa lahat.