Inalis na ng Office of the Prosecutor ng International Criminal Court (ICC) ang isang insidente ng pagpaslang na may kaugnayan sa droga sa kasong crimes against humanity laban kay da¬ting Pangulong Rodrigo “Digong” Duterte.
Nitong Martes, Oktubre 20, naghain ang prosekusyon ng updated version ng Trial Brief kung saan tinanggal ang Incident 57 alinsunod sa utos ng ICC Trial Chamber III.
“Pursuant to the Chamber’s order, the Prosecution has removed all references to Incident 57 in the Trial Brief and replaced them with ‘[DELETED]’ in order to retain cross-references,” saad sa dokumento.
“References to Incident 57 have also been removed from Annexes C.1 and C.2 of the Trial Brief,” dagdag dito.
Wala namang binago sa listahan ng mga saksi at ebidensiya ng prosekusyon.
Nauna nang nagpasya ang chamber na hindi maaaring isama ang insidente dahil naganap ito sa labas ng panahong saklaw ng ikalawang count ng kaso, na tumutukoy sa umano’y pagpatay sa mga high-value target mula Hulyo 2016 hanggang Hulyo 2017. (Angelika Cabral)
---
Pormal nang isinumite ng House prosecution ang kanilang offer of evidence sa Senate impeachment court laban kay Vice President Sara Duterte, ayon kay prosecution adviser Robert Ace Barbers.
Sinabi ni Barbers na isinumite nila ang mga ebidensiya, na kinabibilangan ng mga bank, tax, at corporate records sa Senado noong Martes ng gabi
Idinagdag din ng prosekusyon ang net worth disclosure filings upang masuportahan ang kanilang alegasyon kay Duterte na nagkamal ito ng unexplained wealth at bigong isiwalat ang totoong net worth.
Sa Oktubre 23 pa ang deadline para sa formal offer of evidence, pero inagahan ng prosekusyon ang pagsasampa nito.
Tiwala naman si Barbers na mahihirapan ang defense team na malusutan ang mga mabibigat na ebidensiya ng prosekusyon, lalo na ang testimonya ni forensic financial analyst Alexander Cabrera, na si Duterte ay maaaring may unexplained wealth na mula P817 milyon hanggang P1.5 bilyon simula noong 2022.
Kumpiyansa ang prosecution team na ibabasura lamang ng Impeachment Court sakaling maghain ng demurrer to evidence ang mga abogado ni Duterte dahil wala itong basehan.
“Prerogative po ‘yan ng defense to file demurrer to evidence, which means they are challenging the evidence which have been presented already by the prosecution on the ground of being weak. But I think the Filipino people were able to witness the evidence presented by the prosecution panel,” saad ni lead prosecutor at Batangas Rep. Gerville Luistro
“On the contrary, they are strong, clear, convincing. So for me, I do not see the ground for filing a demurrer to evidence. Bagaman Congressman Joel Chua already expressed his challenge to the defense in filing one against the evidence of the prosecution,” dagdag pa ng mambabatas. (Bernard Taguinod)