Pinapalakas ng Department of Social Welfare and Development (DSWD) ang paghahanda nito sa posibleng epekto ng El Niño, kabilang ang pagtiyak na ligtas at maayos ang kalidad ng mga family food packs na nakaimbak sa mga warehouse sa buong bansa.
Ayon kay DSWD Spokesperson Assistant Secretary Irene Dumlao, may sinusunod na mga parameter ang ahensya upang mapanatiling ligtas ang mga relief goods at maiwasan ang pagkasira o pagkapanis ng mga ito dahil sa mataas na temperatura.
Kabilang sa mga hakbang ang regular na monitoring ng temperatura sa mga warehouse at pagtiyak na maayos ang kondisyon ng mga lugar na pinag-iimbakan ng food packs.
Nag-i-install din ang ahensya ng mga industrial ceiling fan upang makatulong sa pagpapababa at pagkontrol sa temperatura sa loob ng mga warehouse.
Kasabay nito, nakikipag-ugnayan ang DSWD sa mga local government unit o LGU upang maglaan ng mga heat-insulated areas sa evacuation centers.
Layunin nitong maprotektahan ang mga internally displaced persons (IDPs) laban sa matinding init, lalo na kung magkakaroon ng paglikas dahil sa mga sakuna habang umiiral ang mataas na heat index.
Inihahanda rin ng ahensya ang mga kagamitan para sa suplay ng ligtas na tubig, kabilang ang patuloy na deployment ng water filtration trucks at iba pang teknolohiya sa mga lugar na posibleng makaranas ng epekto ng El Niño.
Ayon sa DSWD, nakahanda rin ang mga trained personnel at augmentation support na maaaring i-deploy depende sa pangangailangan ng mga apektadong lugar.
Sinabi ng DSWD na bahagi ito ng paghahanda ng ahensya upang matiyak na nananatiling maayos ang mga relief supplies at may sapat na suporta ang mga komunidad bago pa lumala ang epekto ng matinding init at iba pang sakuna.
---
Kinumpirma ng Department of Justice na sila’y maghahain ng petisyon para sa ‘extradition’ ng nakadeteneng si Pastor Apollo Quiboloy.
Ayon kay Justice Secretary Fredderick Vida, malapit na umanong ihain ng kagawaran ang naturang petisyon sa kaukulang hukuman.
Nasa ‘final stages’ na aniya ito at kasalukuyang isinasailalim sa ‘legal scrubbing’ upang maisapinal ang ihahaing petisyon ng DOJ.
Dagdag pa ng kalihim, makatitiyak umano na ang gobyerno ng bansa ay tatalima sa ‘extradition treaty’ ng Pilipinas sa Estados Unidos.
Kanya ding binanggit ang mas malinaw nang panuntunan ng Korte Suprema kaugnay sa pagpapatupad o proseso ng ‘extradtion’.
Bagama’t inihayag na sila’y maghahain na ng petisyon, hindi na nagbahagi pa ng tiyak na petsa o ‘timeline’ ang kalihim kung kailan ito mangyayari.
Ngunit makakaasa naman umanong ‘within the year’ o ngayong taon 2026 maihahain ang petisyon sapagkat hindi raw nila kontrolado ang lahat nangyayari sa proseso.
Basta’t aniya’y nasa ‘final stage’ na ang petisyon para sa kahilingan na ma-extradite ang naturang pastor.
Si Pastor Quiboloy ay nahaharap sa kasong qualified human trafficking, child abuse at sexual abuse sa bansa.
Habang sa Estados Unidos nama’y mga kasong sex trafficking at sexual abuse trafficking ng mga menor de edad.