Pinabulaanan ng chief of staff ni Senador Robinhood Padilla na si Atty. Rudolf Philip Jurado ang alegasyon na lumabag ang senador sa Anti-Wiretapping Law, at iginiit niyang walang malinaw na batayan ang mga paratang.
Reaksiyon ito ni Jurado sa pahayag ni Atty. Barry Gutierrez, na maaari umanong makasuhan si Padilla ng paglabag sa Anti-Wiretapping Law sa pagpapalabas niya ng isang audio clip sa budget deliberation ng Presidential Communications Office (PCO).
Maaari rin daw itong isampa bilang ethics complaint bukod pa sa kasong kriminal.
Bwelta ni Jurado, sa ngayon ay hindi pa napatutunayan ang pagiging tunay ng audio recording na tinutukoy, pati na ang pagkakakilanlan ng mga taong umano’y sangkot at ang paraan kung paano ito nakuha.
Aniya, wala pang pormal na imbestigasyong nagpapatunay sa mga detalye ng naturang audio.
Binigyang-diin din ni Jurado na mayroong parliamentary immunity ang mga senador at kongresista sa ilalim ng Privilege of Speech and Debate, na nagbibigay sa kanila ng kalayaang magpahayag, magdebate, at gampanan ang kanilang tungkulin nang hindi natatakot sa posibleng kaso dahil sa mga pahayag o gawaing kaugnay ng kanilang opisyal na trabaho.
------
Inakusahan ni Russian Ministry of Foreign Affairs spokesperson Maria Zakharova ang Amerika ng pagre-recruit ng mga Pinoy para ipansabak sa giyera ng Ukraine laban sa Russia.
Ayon kay Zakharova, nagsimula na umano ang kinatawan ng kompanyang RMS International mula Florida sa pangangalap ng mga Pilipinong nasa US para isabak sa digmaan sa panig ng Armed Forces of Ukraine (AFU).
Sa impormasyon na hawak ng Moscow, tinatarget umano ng grupo ang mga dating pulis, dating sundalo at mga retirado dahil mas madaling sanayin ang mga ito.
Nasa $5,000 o P280,000 kada buwan ang pangakong suweldo ng kompanya.
Ang mga pipirma ng kontrata ay bibigyan umano ng Schengen work visa mula sa embahada ng Germany sa Maynila at ililipat kalaunan sa ibang bansa, kabilang ang Poland at Ukraine.
Samantala, wala pang pahayag mula sa US, Ukraine at Pilipinas sa akusasyon ni Zakharova.
----
Isang Filipina domestic worker ang nasa kritikal na kondisyon habang isa naman ay patuloy na pinaghahanap matapos ang malaking sunog na tumupok sa isang high-rise residential complex sa Tai Po district sa Hong Kong, ayon sa Department of Foreign Affairs (DFA).
Ayon kay Foreign Affairs spokesperson Angelica Escalona nitong Huwebes ng gabi, Nobyembre 27, parehong overseas Filipino workers ang dalawang babae at parehong nagtatrabaho bilang domestic helpers.
Isa sa kanila ang kasalukuyang naka-confine sa intensive care unit ng isang ospital, habang nagpapatuloy naman ang paghahanap sa isa pa.
Sinabi ni Escalona na wala pang kumpirmadong Pilipino sa 65 nasawi batay sa ulat ng mga awtoridad sa Hong Kong.
Patuloy na nakikipag-ugnayan ang Philippine Consulate General sa Hong Kong sa Police Force, Labour Department at Home Affairs Department ng teritoryo para matukoy ang kinaroroonan ng nawawalang Pilipino at maberipika ang lagay ng iba pang apektadong kababayan.
“Mahigpit na mino-monitor ng Department ang sitwasyon sa Tai Po,” ani Escalona sa Ingles.
Nagpasalamat din ang opisyal sa Hong Kong authorities “na tumutulong sa paghahanap, pagkilala at pag-asikaso sa mga apektadong Pilipino.”
Ayon sa DFA, 23 Filipino domestic workers ang nakatanggap na ng tulong mula sa Consulate, Migrant Workers Office at Overseas Workers Welfare Administration.
Naglunsad din ang tatlong ahensiya ng joint visit sa mga shelter ng gobyerno ng Hong Kong para mag-abot ng suporta sa mga OFW na naapektuhan at nailikas.
Pinakahuling bilang ng nasawi. Sa hiwalay na pahayag, sinabi ng mga awtoridad sa Hong Kong nitong Biyernes na umakyat na sa hindi bababa sa 94 ang kumpirmadong nasawi sa pinakamalalang sunog sa lungsod sa loob ng maraming dekada.
Halos naapula na ang apoy at nagpapatuloy ang paghanap sa mga residente na iniulat pang nawawala matapos mawasak ang ilang gusali sa mataas na compound. — Base sa ulat ni Camille Diola at reports galing sa AFP