Nagka-usap sa telepono si Pangulong Ferdinand Marcos Jr. at Ukraine President Volodymyr Zelensky.
Sa nasabing pag-uusap, kapwa kinilala ng dalawang lider ang positibong pag-unlad na ito sa bilateral na relasyon ng kanilang mga bansa.
Ibinahagi ni Pangulong Marcos na napag-usapan nila ni Pangulong Zelensky ang iba’t ibang oportunidad para sa karagdagang pagtutulungan sa pagitan ng Ukraine at Pilipinas.
Partikular niyang binanggit ang ilang mga larangan kung saan maaaring palakasin ang kooperasyon.
Ayon kay Pangulong Marcos, ang kanilang pag-uusap ay nakatuon sa kooperasyon sa mga mahahalagang sektor tulad ng food security, agrikultura, at digitalization.
Kaugnay ng pagiging host country ng Pilipinas sa 2026 ASEAN Summit, isa rin sa mga natalakay ay ang pagpapalakas ng ugnayan sa pagitan ng ASEAN at Ukraine.
-----------
Pinuna ni Sen. Joel Villanueva ang Department of Health dahil sa ‘nasayang’ na mga health products na nagkakahalaga ng P11.1-B na karamihan ay mga suplay para sa COVID.
Sa deliberasyon sa budget ng Department of Health (DOH) sa plenaryo ng Senado, ipinakita ni Villanueva ang audit report na nagpapahiwatig na tumaas ng 11,656.32 porsyento ang nasayang na produktong pangkalusugan mula 2020 hanggang 2023
Ayon sa datos, noong 2020, ang nasayang na produkto ay umabot sa P95 milyon; P85.213 milyon noong 2021; P7.4 bilyon noong 2022; at pagsapit ng 2023, ang halaga ng mga nasayang na produkto ay tumaas sa P11.186 bilyon.
Nilinaw ni Sen. Pia Cayetano, sponsor ng badyet ng DOH, na ang matinding pagtaas, lalo na noong 2023, ay dahil sa natambak na suplay para sa COVID-19.
“Talagang natambakan, Mr. President, that is the reality,” ani Cayetano.
Upang matugunan ang isyu, iniulat ng DOH na pinapahusay nila ang sistema sa pamamahala ng asset at supply chain upang matiyak ang mas mahusay na paggamit at pamamahagi ng mga produktong pangkalusugan upang maiwasan ang pag-aaksaya.
Nabanggit din na ang mga expired na gamot ay dapat itapon nang maayos, dahil mayroong itinakdang proseso para sa ligtas na pagtatapon ng mga ito.
---------
Nagsalita na si First lady Liza Araneta Marcos matapos idawit ang kanyang pangalan ni da¬ting Ako Bicol Party-list Rep. Zaldy Co sa isyu ng umano’y cartel sa sibuyas at bigas.
“While some may choose theatrics, I’d rather focus on teaching future lawyers how the law truly works — where truth is the standard and proof is the language we live by,” anang Unang Ginang.
Ang pahayag ay ginawa ng Unang Ginang matapos siyang idawit kasama ang kanyang kapatid na lalaki sa umano’y smuggling ng bigas at sibuyas.
Sinabi ng First Lady na “drama” ang mga pahayag ni Co subalit hindi na ito nagbigay pa ng dagdag na paliwanag.
Kasabay nito sinabi ng Unang Ginang na ipinagmalaki niya ang kanyang mga estudyante dahil sa kabila ng mga bagyo, lindol at pekeng bomb threats sa Iloilo City ngayong semestre, ay nagawa pa ring dumalo sa kanyang klase nang nakahanda at pag-aralan ang mga bagong batas. (Aileen Taliping)