Pinagtibay nina Pangulong Ferdinand R. Marcos Jr. at Ukrainian President Volodymyr Zelenskyy ang mainit na ugnayan ng Pilipinas at Ukraine ng magkausap ang dalawa sa pamamagitan ng telepono.
Tinalakay ng dalawang lider ang posibleng kooperasyon sa food security, agrikultura, at digitalization. Ayon kay Pangulong Marcos, naglatag sila ng mga paraan upang pagtibayin pa ang ugnayan bilang paghahanda sa pagkapangulo ng Pilipinas sa ASEAN sa susunod na taon, kabilang na ang pagpapalakas ng ASEAN–Ukraine engagement..
**
Tiwala ang kampo ng mga biktima ng drug war na ibabasura ng appeals chamber ng International Criminal Court (ICC) ang apela ng kampo ni dating Pangulong Rodrigo Duterte kaugnay sa hirit nitong pansamantalang paglaya o interim release.
Matatandaang una na itong tinanggihan ng pre-trial chamber ng ICC.Ayon kay Atty. Kristina Conti, assistant to counsel ng ICC, hindi pumapasa sa pamantayan ng ICC ang mga argumento ng kampo ni Duterte para sa interim release. Aniya, ang desisyon na ito ay 99% confident sila na hindi papayagan ang apela.
**
Maaaring hulihin at kasuhan ng inciting to sedition ang sinumang raliyista na mananawagan ng government reset o pag-withdraw ng suporta sa gobyerno sa ikakasang anti-corruption rally sa Nobyembre 30.
Ito ang iginiit ni Defense Secretary Gibo Teodoro, kung saan, aniya, iligal ang anumang pahayag na humihikayat sa pag-aatras ng suporta sa pamahalaan.
Sa kasagsagan ng isyu tungkol sa katiwalian sa mga flood control projects, may ulat na may nag-uudyok sa militar upang bawian ang suporta sa Pangulo at pamunuan ang reset o pagpapalit ng liderato sa bansa.
Sa tanong kung bakit muling lumulutang ang panawagang “reset,” sinabi ng kalihim na malinaw na may politikal na hangarin ang mga nagtutulak nito. Naniniwala din ang kalihim na palaging may umiiral na mga banta, ngunit umaasa siyang magiging mapayapa ang kilos-protesta.