Skip to content

November 16 - 6am NEWS

November 16 - 6am NEWS
DONNA NATIVIDAD-ARENAS
Nov 16, 2026 | 6:15 AM

Hindi mangyayari ang inaabangan ng publiko na haharap sa impeachment trial sina Vice President Sara Duterte at mister nitong si Atty. Manases Carpio dahil wala ang pangalan ng mga ito sa listahang ng witness na ihaharap ng defense sa Huwebes at Biyernes.

Ito ang lumalabas sa manifestation with request of subpoena ad testificandum and decus tecum na isinumite ng mga abogado ng Bise Presidente sa Impeachment Court noong Sabado.

Base sa nasabing dokumento na na-copy furnished ang prosecution team, apat (4) lamang ang ipina-subpoena ng defense panel na kinabibilangan ni Atty. Reiner dela Fuente ng AML Consulting Philippines na tetestigo sa “fundamental legal concept” kaugnay ng Anti-Money Laundering Act.

Magugunita na ini-report ng Anti-Money Laundering Council (AMLC) sa Impeachment Court na umaabot sa P4.4 bilyon ang pumasok na pera sa bank accounts ng mag-asawang Duterte at Carpio mula 2007.

****

Itinaas ng Supreme Court (SC) ang halagang matatanggap na danyos ng mga biktima ng rape at iba pang krimen upang mas tumugma ito sa bigat ng krimen at pinsalang dinanas ng mga biktima.

Sa desisyon ng SC En Banc sa People v. Flores noong Nobyembre 4, itinaas sa P325,000 bawat isa mula P100,000 ang civil indemnity, moral at exemplary damages sa kasong qualified rape of a minor.

Sa acts of lasciviousness, itinaas naman ang mga ito sa P175,000 bawat isa mula P50,000.

Ang bagong halaga ay itinakda sa kaso ng isang batang babae na anim na taong gulang nang mangyari ang pang-aabuso.

Ayon sa SC, kailangang baguhin ang halaga ng danyos dahil nagbabago rin ang presyo ng mga bilihin at gastusin sa pamumuhay. Hindi rin sapat na pera lamang ang maging batayan dahil hindi nito kayang tumbasan ang pinsalang dulot ng seksuwal na karahasan sa biktima.