Posibleng malampasan ng Commission on Elections (COMELEC) ang target nitong tatlong milyong bagong rehistradong botante para sa 2028 National and Local Elections, kasunod ng mataas na bilang ng mga nagparehistro sa unang dalawang araw ng voters registration.
Ayon kay COMELEC Chairman George Erwin Garcia, halos 80,000 na ang naitalang aplikasyon sa buong bansa mula nang magsimula ang registration noong Nobyembre 10.
Mas mataas ito kumpara sa nakaraang registration period noong Agosto 2025, kung saan nasa 20,000 lamang ang naitalang nagparehistro sa unang dalawang araw.
Ikinatuwa rin ni Garcia ang pagdagsa ng mga kabataan, partikular ang mga edad 17 at 18, na nagpapakita umano ng interes ng bagong henerasyon sa susunod na halalan.
***
Nakatakdang mamahagi ng P10,000 bilang financial aid at family food packs ang Department of Social Welfare and Development sa mga apektadong food stalls at tindero sa napipintong ASEAN Summit sa susunod na linggo.
Matatandaang pansamantalang ipinasara ang ilang mga food stalls sa Pasay at Parañaque bilang bahagi ng security measures habang nagpapatuloy ang naturang ASEAN summit.
Ayon sa inilabas na statement ni Social Welfare Secretary Rex Gatachalian kanilang siniguro na makapagbigay sila ng agarang tulong para sa mga maaapektuhang food stall owners sa Pasay City at Parañaque City.
Dagdag pa ni Gatchalian na humihingi sila ng paumanhin sa mga Pilipinong apektado ng pansamantalang pagsasara.
Binigyang diin din ni Gatchalian na kahit pa malaki ang gagampanan ng ASEAN summit sa Pilipinas, importante pa ring bigyang pansin at prayoridad ang kabuhayan ng bawat mamamayang Pilipino.
**
Nagkaisa ang Department of Health (DOH) at Department of Finance (DOF), kasama ang iba’t ibang health professional, upang isulong ang pagpapataas ng excise tax sa mga produktong may mataas na nilalamang nakakaadik at matatamis na inumin.
Partikular na tinutukoy sa panukalang ito ang mga inuming may alkohol, tabako, pati na rin ang mga sugar-sweetened beverages na direktang nakakaapekto sa kalusugan ng publiko.
Ayon kay Dr. Paul Filomeno, isang Recovery medicine specialist layunin nitong maprotektahan at mapabuti ang kalusugan ng bawat Pilipino habang lumilikha ng karagdagang pondo na gagamitin upang mas mapalakas ang mga serbisyong pangkalusugan sa bansa.