Binatikos ni Palace press officer Claire Castro si Vice President Sara Duterte matapos nitong amining hindi siya marunong gumamit ng kompyuter.
Sa pahayag noong Mayo 8, kinuwestiyon ni Castro kung paano makakayang mamuno ni Duterte sakaling tumakbo ito sa mas mataas na posisyon sa hinaharap.
Nauna rito, itinanggi ng bise presidente ang alegasyong binato niya ng laptop ang abogado niyang Michael Poa.
Sa panayam, sinabi niyang bihira siyang gumamit ng laptop dahil hindi raw siya marunong mag-operate ng kompyuter at ginagamit lamang ito para sa Zoom meetings.
Lalong umiinit ang palitan ng pahayag sa pagitan ng Palasyo at kampo ng bise presidente sa gitna ng sunod-sunod na batikos at depensa mula sa magkabilang panig.
----
Nagbabala ang isang consumer advocacy group sa mga mambabatas na ang panukalang blanket ban sa access ng mga menor de edad sa social media ay maaaring maglantad sa kanila sa mas malaking panganib online sa halip na protektahan sila.
Sinabi ng CitizenWatch Philippines na maaaring hindi maipakita ng malawakang paghihigpit ang aktuwal na gawi ng mga menor de edad online, at nagbabala na maaari silang itulak ng mga ganitong polisiya sa mga hindi gaanong regulated digital space kung saan mas mahina ang mga pananggalang o proteksiyon at limitado ang pagbabantay.
Binigyang-diin ng co-convenor ng grupo na si dating Quezon City lawmaker Kit Belmonte na bagama’t ang pagprotekta sa mga bata online ay isang lehitimong layunin, ang total ban ay hindi ang tamang solusyon sa masalimuot na mga panganib na kinahaharap ng mga kabataang gumagamit ng internet sa kasalukuyan.
“It may overlook important nuances, create unintended consequences and fail to address the real sources of harm. Protecting minors online should not mean excluding them from the digital world,” ani Belmonte.
Hindi bababa sa 15 panukala sa Kongreso — 10 sa House of Representatives at 5 sa Senado — ang kasalukuyang nagsusulong ng mga restriksiyon o outright bans sa mga menor de edad sa paggamit ng social media, humuhugot ng inspirasyon mula sa mga polisiya na ipinatupad sa mga bansa na tulad ng Indonesia at Australia.
Gayunman, nagbabala ang CitizenWatch na maaaring pahinain ng mga hamon sa pagpapatupad at behavioral realities ang bisa ng naturang mga panukala.
Ayon sa grupo, ang mga menor de edad ay mabilis mag-adapt at maaaring madaling makaiwas sa mga restriksyon sa pamamagitan ng mga virtual private network (VPN), pekeng pagkakakilanlan, o paglipat sa iba pang mga platform.
“Young users are highly adaptive in digital spaces. If access is restricted on mainstream platforms, some may simply migrate to channels that are harder for parents, platforms, and regulators to monitor. That may risk displacing harm rather than reducing it,” dagdag pa ng grupo.
Binigyang-diin ng grupo na ang pagtulak sa mga menor de edad sa hindi lantad na bahagi ng internet ay maaaring magpataas ng kanilang pagkakalantad sa cyberbullying, mapanlinlang o mapang-abusong pag-uugali, panloloko, at malaswang nilalaman.
Nagpahayag din ng pangamba ang grupo sa mas malawak na implikasyon ng pagbabawal sa digital ecosystem. Binanggit nito na ang mga social media platform ay malalim nang nakapaloob sa pang-araw-araw na pamumuhay, na nagsisilbi hindi lamang bilang daluyan ng libangan kundi pati mga kasangkapan para sa edukasyon, komunikasyon, at aktibidad na pang-ekonomiya.
Ang paghihigpit sa access ay maaari ring makaapekto hindi lamang sa mga gumagamit kundi pati sa mga negosyo na umaasa sa digital na pakikipag-ugnayan, kabilang ang maliliit na online sellers at mga content creators.
Kinuwestiyon din ni Belmonte ang kakayahan ng pamahalaan na magpatupad ng isang nationwide ban, partikular sa pag-obliga sa pagsunod mula sa mga global technology companies na maaaring walang malakihang presensiya sa Pilipinas.
“How the government ensures compliance across global platforms is a serious implementation question that deserves careful study,” aniya.
Maaaring mangailangan din ang mga panukala ng mahigpit na sistema ng beripikasyon sa edad, na posibleng gumamit ng sensitibong personal na datos tulad ng mga government-issued ID o biometric na impormasyon.
Nagbabala ang CitizenWatch na maaaring magdulot ang naturang mga requirement ng mga bagong panganib sa privacy para sa mga pamilya at menor de edad.
“Any regulatory model must be workable not only in principle, but also in practice,” sabi ni Belmonte, binigyang-diin ang pangangailangan para sa mga polisiya na kapwa technically feasible at napananatili nang pangmatagalan.
Sa halip na blanket bans, isinusulong ng grupo ang isang “balanced, proportionate regulation” framework na nakatuon sa pagpapalakas ng child safety standards habang pinananatili ang access sa mga benepisyo ng pakikilahok sa digital na mundo.
Kabilang sa mga panukalang hakbang ang mas ligtas na default settings para sa mga menor de edad, mas matibay na parental controls, pinahusay na mga mekanismo sa pag-uulat, at mas mahigpit na pagpapatupad ng mga batas sa data privacy at consumer protection. Ang digital literacy education ay tinukoy rin bilang mahalagang bahagi sa pagtulong sa mga kabataang gumagamit na responsableng makapag-navigate sa mga panganib online.