Tinutunton na ng World Health Organization(WHO) ang mga pasaherong sakay ng isang flight, mula sa isla ng Saint Helena patungong Johannesburg, na sinakyan ng isang cruise ship passenger na nasawi dahil sa hantavirus.
Ayon sa South African airline na Airlink na nakabase sa South Africa, may kabuuang 82 pasahero at anim na crew ang sakay ng nasabing flight noong Abril 25.
Kabilang sa mga pasahero ang isang babaeng Dutch na ang asawa ay pumanaw rin dahil sa nasabing virus. Ayon sa WHO, lumala ang kondisyon ng babae habang nasa biyahe patungong Johannesburg.
Nauna nang bumaba ang babae mula sa barko sa Saint Helena noong Abril 24 matapos makaranas ng sintomas sa gastrointestinal. Pagdating sa isang ospital sa Johannesburg, binawian siya ng buhay at nagpositibo sa hantavirus.
Ang Airlink ay may isang biyahe kada linggo mula sa nasabing isla na tumatagal ng humigit-kumulang apat na oras.
Samantala, inatasan na ng mga awtoridad sa South Africa ang airline na abisuhan ang mga pasahero upang agad makipag-ugnayan sa kanilang health department.
Pinaghihinalaan ng WHO na posibleng kumalat ang hantavirus sa pagitan ng mga pasahero sa cruise ship na kasalukuyang nakaangkla malapit sa Cape Verde.
Bukod sa mag-asawang Dutch, isa ring German passenger ang naiulat na nasawi. Sa ngayon, may pito nang kumpirmado at pinaghihinalaang kaso ng hantavirus na konektado sa insidente.
---
Niyanig ng malawakang drone at missile strikes ng Russia ang Ukraine noong gabi ng Mayo 5, na tumama sa power grid at iba pang imprastraktura, at ikinasawi ng hindi bababa sa limang (5) katao habang 39 ang sugatan.
Ayon sa Ukrainian Air Force, gumamit ang Russia ng 11 Iskander-M ballistic missiles at 164 drones sa magkakasunod na pag-atake. Bagama’t na-intercept ang karamihan, may ilang missiles at drones na tumama sa mga target kabilang ang mga pasilidad sa enerhiya ng Ukraine.
Nabatid na tinamaan ang mga natural gas facility sa Poltava at Kharkiv regions, ayon sa state energy firm na Naftogaz.
Sinabi ng kumpanya na paulit-ulit nang tinatamaan ang kanilang mga pasilidad mula pa nang magsimula ang taon.
Dahil dito kinondena ni Ukrainian President Volodymyr Zelenskyy ang mga pag-atake, at tinawag itong “utter cynicism” ng Moscow, lalo’t ito ay kasabay ng pansamantalang tigil-putukan.
Ayon sa Russia, magpapatupad ito ng unilateral ceasefire sa mga darating na araw kaugnay ng paggunita sa Victory Day, ngunit babala nito na gaganti sila sakaling umatake ang Ukraine.
Tugon ng Kyiv, handa rin itong sumunod sa ceasefire kung susunod din ang Russia, ngunit nagbabala na gaganti rin sila sa anumang paglabag sa kasunduan.
Samantala, nagpapatuloy ang palitan ng pag-atake sa pagitan ng dalawang bansa, kung saan naglunsad din ang Ukraine ng long-range strikes sa loob ng Russian territory.