Nagbanta si US President Donald Trump na aatakehin ang Oman, na isang kilalang kaalyado ng Amerika, sakaling hindi ito magpakatino o mag-“behave”.
Ginawa ng presidente ng US ang naturang banta kasunod ng mga ulat hinggil sa umano’y negosasyon sa pagitan ng Iran at Oman.
Ayon sa mga ulat, nagbabalak ang dalawang bansa na magkasamang magpataw ng toll sa mga barkong dumaraan sa Strait of Hormuz. Ang nasabing Strait ay isang kritikal na ruta para sa mga oil tanker sa buong mundo, na pansamantalang naisara simula nang sumiklab ang digmaan ng US at Israel laban sa Iran.
Una nang idineklara ni Trump noong Martes na muling bubuksan ang lagusan para sa lahat at iginiit na walang sinumang bansa ang may karapatang magkontrol dito. Aniya, babantayan ng Amerika ang lugar bilang bahagi na rin ng kanilang umiiral na pakikipagnegosasyon.
Sa kasalukuyan, wala pang inilalabas na paglilinaw ang White House hinggil sa kontrobersiyal na pahayag ni Trump, at hindi pa rin nagbibigay ng opisyal na tugon ang Embahada ng Oman sa Washington ukol sa usapin.
---
Nanawagan ang World Health Organization (WHO) ng agarang tigil-putukan sa silangang bahagi ng Democratic Republic of the Congo (DRC) upang mapigilan ang pagkalat ng Ebola habang patuloy ang labanan sa rehiyon.
Ayon sa WHO, lumalala ang outbreak ng Ebola sa gitna ng nagpapatuloy na sigalot, dahilan upang magsiksikan ang mga lumikas sa mga evacuation at displacement camps kung saan mas mabilis kumalat ang sakit.
Sinabi ni WHO Director-General Tedros Adhanom Ghebreyesus na ang sitwasyon sa eastern DRC ay lubhang naapektuhan ng digmaan at sakit, kung saan nahihirapan ang mga health worker na makapagbigay ng tulong dahil sa kaguluhan.
Ayon sa kanya, hindi magiging epektibo ang pagtugon sa outbreak kung patuloy ang pambobomba at labanan, kaya nanawagan siya sa lahat ng panig na magpatupad ng agarang ceasefire.
Ang kasalukuyang Ebola outbreak ay mula sa Bundibugyo strain, na walang aprubadong bakuna o lunas, at idineklara ng WHO bilang international health emergency dahil sa mabilis na pagdami ng kaso.
Mahigit 900 na ang pinaghihinalaang kaso at higit 200 ang pinaghihinalaang nasawi sa tatlong probinsya sa eastern Congo, kabilang ang mga lugar na kontrolado ng mga rebeldeng grupo.
Ayon sa mga humanitarian organization, marami sa mga namatay ay mga bata, habang ang mga refugee sites sa karatig-bansa na Uganda ay lampas na sa kapasidad dahil sa pagdagsa ng mga lumikas.