Iniulat ng Embahada ng Pilipinas sa Warsaw na ligtas at accounted ang lahat ng Pilipino sa Ukraine kasunod ng panibagong missile at drone strikes ng Russia sa Kyiv na kumitil sa apat na buhay at ikinasugat ng humigit-kumulang 100 katao.
Simula nitong nakaraang weekend, patuloy na sinusubaybayan na ng embahada ang kalagayan ng maliliit na komunidad ng mga Pilipino na nasa Kyiv at nasa iba pang lungsod sa Ukraine.
Una rito, naglunsad ang Russia ng magkakasunod na pag-atake gabi ng Sabado, Mayo 23, gamit ang mga drone at hypersonic Oreshnik intermediate-range ballistic missile.
Winasak ng mga ito ang dose-dosenang kabahayan, paaralan, pamilihan, at isang museo sa Kyiv. Kinumpirma naman ni Ukrainian President Volodymyr Zelensky na hindi naharang ng kanilang air defense ang lahat ng ballistic missile, na ang karamihan ay sadyang itinarget sa kabisera.
Ayon naman sa Russian Defense Ministry, ang pag-atake ay ganti sa umano’y pambobomba ng Ukraine sa mga sibilyang pasilidad sa loob ng Russia, isang paratang na mariing itinanggi naman ng panig ng Ukraine.
---
Kinumpirma ng mga awtoridad na hindi bababa sa 82 katao ang mga nasawi matapos ang isang gas explosion sa isang coal mine sa Shanxi province sa China malayo sa naunang ulat na 90 katao ang nasawi.
Batay sa ulat ng state news agency na Xinhua, naganap ang aksidente noong Biyernes ng gabi sa Liushenyu coal mine sa Changzhi city.
Sa pinakahuling briefing ng mga opisyal, kinumpirma ng mga ito na 82 ang nasawi, mahigit 120 ang naospital, at dalawa pa ang patuloy na pinaghahanap na pinaniniwalaang wala nang buhay sa ngayon.
Inilarawan ng mga awtoridad na “chaotic” ang sitwasyon matapos ang pagsabog, habang patuloy ang imbestigasyon sa sanhi ng insidente.
Ayon sa mga opisyal, may natuklasang “serious violations” sa operasyon ng minahan, ngunit hindi pa inilalabas ang kumpletong detalye tungkol sa mga paglabag.
Libu-libong rescuers at medical personnel naman ang agad na ipinadala sa lugar upang tumulong sa search and rescue operations.
Marami sa mga nasugatan ay naapektuhan ng nakalalasong gas, ayon sa ulat ng state broadcaster.
Liban dito inatasan na ni Chinese President Xi Jinping ang agarang pagsagip sa mga nawawala at nanawagan din ng masusing imbestigasyon upang mapanagot ang mga sangkot sa pinakamalalang mining disasters sa China sa nakalipas na mahigit 15 taon.
Samantala lumutang naman sa mga ulat na may mga paglabag sa safety protocols ng cole mine, kabilang ang umano’y hindi pagsunod sa mandatory tracking devices para sa mga manggagawa at hindi tugmang mining blueprints na ibinigay sa mga awtoridad.
Ipinahayag din ng state media na ang bilang ng mga nasa loob ng minahan noong oras ng pagsabog ay posibleng doble sa nakasaad sa opisyal na tala ng kumpanya, na nagpalala sa sitwasyon ng rescue operations.