Hindi inaalis ng Bureau of Immigration (BI) ang posibilidad na nakalabas na ng Pilipinas si Senador Ronald dela Rosa, kasunod ng kanyang naunang pag-alis sa Senate custody.
Ayon kay BI spokesperson Dana Sandoval, nananatiling bukas ang posibilidad ng paggamit ng mga backdoor channels o tagong lagusan palabas ng bansa gaya ng mga liblib na pantalan.
Aniya, palaging isinasaalang-alang ng BI ang ganitong anggulo tuwing may kahalintulad na sitwasyon. Gayunpaman, tiniyak ni Sandoval na bantay-sarado ang mga tinuturing na illegal migration corridors sa tulong ng Philippine National Police, Philippine Coast Guard, at mga lokal na pamahalaan.
Kung may tangkang pagtakas, agad umanong inaalerto ang BI, kabilang na ang pagkakakilanlan ng mga nahaharang na indibidwal, lalo na kung mga dayuhan. Batay sa opisyal na rekord ng BI, nananatiling walang naitalang paglabas ng bansa si Sen. Dela Rosa.
**
Inihayag ng Office of the Ombudsman na target nitong ihain ngayong linggo ang kasong plunder laban kay Senador Jinggoy Estrada kaugnay ng umano’y maanomalyang flood control projects.
Ayon kay Ombudsman Jesus Crispin Remulla, pipirmahan niya ang information laban sa senador bago ito isumite sa Sandiganbayan, na inaasahang maisasampa sa Huwebes. Bukod sa plunder, kasama rin ang iba pang kaugnay na kaso.
Nauna nang inirekomenda ng Department of Justice (DOJ) ang pagsasampa ng plunder, graft, at direct bribery charges laban kay Estrada at ilang opisyal, kabilang si dating Public Works Secretary Manuel Bonoan.
Ipinaliwanag ni Remulla na bahagyang naantala ang paghahain ng kaso dahil kinailangang ayusin at linawin ang resolusyon upang mas maging matibay ang ihahaing impormasyon.
**
Binatikos ni Kalookan Archbishop Cardinal Pablo Virgilio David si Senate President Alan Peter Cayetano matapos nitong ikonekta bilang “pro-life” ang madugong war on drugs ng administrasyong Duterte.
Nag-ugat ang reaksiyon ng kardinal sa post ng senador noong nakaraang linggo kung saan tinawag niyang isang kampanya para sa human rights at pro-life ang naturang drug war.
Tanong ni Cardinal David, paano ito masasabi ng senador sa harapan ng libu-libong biyuda at naulilang bata na nawalan ng mahal sa buhay nang walang legal na proseso.
Dagdag pa ng kardinal, hindi lamang binaril ang mga biktima; marami ang dinukot, tinortyur, at iniwan sa kalsada na balot ng plastic bag ang ulo at balot ng packaging tape ang leeg.