Pasado na sa House Committee on Government Enterprises ang House Bill No. 207, panukalang batas na nagpapababa ng optional retirement age ng government workers, kabilang ang mga guro sa pampublikong paaralan sa 56 anyos mula sa 60.
Ayon kay House Deputy Minority Leader at ACT Teachers Party-list Rep. Antonio Tinio, na isa sa co-author ng panukalang batas, isang mahalagang hakbang ang pag-apruba ng komite sa naturang panukala tungo sa mas makataong retirement policy para sa mga guro at empleyado ng gobyerno na inilaan ang kanilang buhay sa serbisyo publiko.
Nagbibigay din aniya ang panukalang batas ng pagkakataon para sa tunay na pagpili upang makapagretiro sa edad na 56 matapos ang matinding pagod o “burnout” na dulot ng napakabigat na trabaho.
Iginiit din ng mambabatas na ang naturang panukala ang sagot sa matagal ng hinihiling ng mga guro.
**
Naglabas ng Executive Order No. 116 si Pangulong Ferdinand R. Marcos Jr. na nag-uutos na taasan ang Minimum Access Volume (MAV) o dami ng pinapayagang angkat na karne ng baboy sa bansa para sa taong 2026.
Sa ilalim ng bagong kautusan, itataas ang alokasyon ng pork imports mula sa kasalukuyang 54,210 metric tons (MT) patungong 204,210 MT.
Layunin nito na mapanatili ang sapat na suplay at masigurong abot-kaya ang presyo ng karne ng baboy at mga processed meat products sa merkado.
Para sa Palasyo, ang nasabing habang ay bahagi ng mas malawak na Unified Package for Livelihoods, Industry, Food, and Transport (UPLIFT) agenda ng administrasyon sa ilalim ng EO 110.
Layon nitong mapagaan ang epekto ng krisis sa Middle East sa ekonomiya ng Pilipinas at maprotektahan ang kapakanan ng mga apektadong sektor.
***
Abala na ang House prosecution panel sa masusing paghahanda para sa impeachment trial ni Vice President Sara Duterte sa Senado.
Inilarawan ni Batangas Rep. Gerville Luistro ang kanilang sitwasyon na tila muling pagbabalik sa paghahanda para sa Bar examinations, dahil halos lahat ng miyembro ng panel ay nagre-review ng rules on evidence at iba pang legal na proseso.
Ayon kay Luistro, nagsagawa ang grupo nitong Miyerkules ng “prosecutors learning from prosecutors” session na pinangunahan ni Rep. Chel Diokno.
Tinalakay dito ang mga patakaran sa ebidensya at mga hakbang sa proseso ng paglilitis.