Kumitil ng 19 na katao ang inilunsad na panibaging air strikes ng Israel sa Lebanon.
Base sa Health Ministry ng Lebanon, nasa sampu sa mga napaslang, kabilang ang tatlong bata at tatlong kababaiha, ang nasawi sa pag-atake na tumama sa isang bahay sa Deir Qanoun town.
Ang panibagong mga pagkasawi ay naitala wala pang isang linggo matapos i-anunsiyo ng Amerika na nagkasundo ang Lebanon at Israel na palawigin pa ang ceasefire sa loob ng 45 araw habang nakatakdang ipagpatuloy ng dalawang panig ang pag-uusap simula sa Hunyo.
Sa kabila ng ceasefire extension, kapwa pa rin nagpatuloy sa palitan ng paglulunsad ng pag-atake ang Israel at Hezbollah partikular na sa may southern Lebanon.
Sa isang statement, sinabi ng health ministry ng Lebanon na maliban sa mga nasawi sa Deir Qanoun, mayroon ding tatlong katao ang nasugatan kabilang ang isang batang babae.
Mayroon ding siyam na katao ang napatay at 29 ang nasugatan sa air strikes ng Israel sa Nabatieh at Tyre districts.
Sa pinakahuling ulat ng healh ministry noong Lunes, pumalo na sa 3,000 katao ang bilang ng napatay sa Lebanon dahil sa strikes ng Israel sa kasagsagan ng labanan sa pagitan nila ng Hezbollah simula noong Marso.
---
Posibleng talakayin sa pulong sa pagitan nina Chinese President Xi Jinping at Russian President Vladimir Putin ang giyera sa Ukraine.
Napaulat na nakadepende ang Russia sa exports ng China gaya ng dual-use items at drone components, para masustine ang kanilang military operations sa Ukraine.
Bagamat nananatiling “neutral” ang China sa giyera sa pagitan ng Russia at Ukraine, at nananawagan din ito ng mapayapang pagresolba sa digmaan sa pamamagitan ng dayalogo.
Subalit, binatikos din ng China ang pagpataw ng Western sanctions laban sa Russia na tinawag nitong iligal at hindi makatarungan.
Maliban sa usapin sa giyera sa Ukraine, ilan pa sa mahahalagang isyung posibleng talakayin ng dalawang lider ang pagpapalalim pa ng trade relations sa pagitan ng dalawang bansa. Pangunahin dito ang massive energy supplies ng Russia kabilang ang oil at gas sa gitna ng krisis sa Strait of Hormuz.
Ito naman na ang ika-25 official visit ng Russian President sa China, ang kaniyang unang foreign visit ngayong taon.
Ang summit naman sa pagitan nina Xi at Putin ay ilang araw lamang matapos ang pagbisita ni US President Donald Trump sa China.