Hindi bababa sa 56 na tauhan ng Land Transportation Office o LTO ang sinampahan ng administrative cases ayon kay LTO Chief at Transportation Assistant Secretary Markus Lacanilao.
Kabilang sa mga kasong isinampa laban sa mga empleyado ang grave misconduct, serious dishonesty, gross neglect of duty, extortion, falsification of official documents, at iba pang paglabag na may kaugnayan sa integridad ng ahensya.
Giit ni Lacanilao, bahagi ito ng ipinatutupad niyang kampanya laban sa korapsyon at kapabayaan sa ahensya sa ilalim ng kanyang 7-Point Priority Agenda na nakatuon sa integridad, katapatan, at dekalidad na serbisyo.
Dagdag pa niya, hindi lamang mga operasyon laban sa mga fixer at pasaway na motorista ang tinututukan ng LTO, kundi pati na rin ang paglilinis sa hanay ng sariling mga tauhan upang maibalik ang tiwala ng publiko sa ahensya.
***
Walang narekober na CCTV footage sa mismong posisyon ng mga tauhan ng Office of the Sergeant-at-Arms (OSAA) at Philippine Marines kaugnay ng shooting incident sa Senado noong gabi ng Miyerkules, Mayo 13.
Ito ang inihayag ni OSAA Chief at Retired Major General Mao Aplasca nang tanungin ukol sa mga ebidensyang posibleng magagamit sa pormal na imbestigasyon.
Ayon kay Aplasca, tanging ang posisyon ng mga ahente ng National Bureau of Investigation (NBI) at ang “dulo ng tactical personnel” ng Senado ang nahagip sa kanilang pagrereview ng mga CCTV.
Pinabulaanan din ni Aplasca ang mga ulat hinggil sa kumakalat na video kung saan maririnig diumano si Senador Jinggoy Estrada na nag-uutos na itago ang CCTV footage.
**
Umabot sa isang milyong konsyumer ng Manila Electric Company (Meralco) ang nakaranas ng power interruptions kamakailan matapos isailalim sa red alert ang Luzon power grid dahil sa manipis na reserba ng kuryente.
Ayon sa Meralco, nagpatupad sila ng Manual Load Dropping (MLD) o rotational brownouts kasunod ng abiso ng National Grid Corporation of the Philippines (NGCP) na inilagay sa red alert ang Luzon mula alas-3:00 ng hapon hanggang alas-8:00 ng gabi noong Miyerkules.
Ipinatupad ang red alert dahil sa forced outage ng ilang power plants na nagresulta sa kakulangan ng higit 3,000 megawatts ng combined capacity.