Nagpadala ang Iran ng proposal sa Estados Unidos, sa pamamagitan ng tagapamagitan na Pakistan, na naglalayong wakasan ang giyera sa iba’t ibang panig ng Middle East.
Sa kanilang panukala, iginiit ng Iran ang pagtanggal ng US Office of Foreign Assets Control (OFAC) sanctions sa Iranian oil sales sa loob ng 30 araw at ang pagwawakas sa naval blockade ng Amerika sa kanilang mga daungan.
Ayon sa mga ulat, kabilang sa hiling ng Iran ang pamamahala sa Strait of Hormuz sakaling maisakatuparan ng US ang mga partikular na commitment, na hindi na tinukoy pa.
Gayunpaman, sa pamamagitan ng kaniyang Truth Social platform, mariing tinutulan ni US President Donald Trump ang counterproposal ng Iran.
Ayon kay Trump, “totally unacceptable” o ganap na hindi katanggap-tanggap ang mga kondisyong inilatag ng Iran para wakasan ang giyera.
Nagbabala rin ang Iran na hindi ito magpapapigil sa pagganti laban sa anumang bagong pag-atake ng Amerika at hindi papayagan ang pag-deploy ng mas maraming foreign warships sa Strait of Hormuz.
Sa isang pahayag, binigyang-diin ni Iranian President Masoud Pezeshkian na hindi sila yuyuko sa kalaban, at ang pakikipag-dayalogo o negosasyon ay hindi nangangahulugan ng pagsuko o pag-atras.
---
Direktang nanawagan si World Health Organization (WHO) Director-General Tedros Adhanom Ghebreyesus sa mga residente ng Tenerife, Spain na manatiling kalmado kaugnay ng pagdating ng cruise ship na MV Hondius na may kaso ng hantavirus.
Sa kanyang mensahe, sinabi ni Tedros na hindi dapat ikumpara ang sitwasyon sa COVID-19 pandemic sa hantavirus dahil mababa pa rin ang panganib nito sa publiko.
Aminado siyang seryoso ang Andes strain ng hantavirus matapos masawi ang tatlong pasahero, ngunit tiniyak niyang wala nang nagpapakita ng sintomas sa kasalukuyan sa mga sakay ng barko.
Ipinaliwanag ni Tedros na mahigpit ang plano ng Spain sa paglikas ng mga pasahero kung saan dadalhin ang mga ito sa industrial port ng Granadilla at direktang iuuwi sa kani-kanilang bansa nang hindi makakahalubilo ang publiko.
Pinasalamatan din niya ang Spain at ang mga residente ng Tenerife sa pagtanggap sa barko bilang bahagi ng international cooperation.
Ayon sa WHO Director, personal siyang pumunta sa Tenerife upang bantayan ang operasyon at magbigay-pugay sa ipinakitang malasakit at pakikiisa ng mga residente at otoridad sa lugar.