Pormal nang inihalal bilang bagong Pangulo ng Senado si Senator Alan Peter Cayetano sa ginanap na botohan sa plenary session ng Mataas na Kapulungan ngayong Lunes, Mayo 11.
Sa kabuuang 24 na senador na dumalo sa sesyon, nakakuha si Cayetano ng 13 boto, sapat upang talunin si Senator Vicente “Tito” Sotto III na nakakuha ng 9 na boto.
Kabilang sa bumoto ng pabor kay Cayetano maliban sa siyam niyang kasamahan sa Minority bloc, ay ang kaniyang kapatid na si Sen. Pia Cayetano at ang magkapatid na sina Sen. Camille at Mark Villar.
Ang siyam na Senador naman na bumoto kay Sen. Sotto sina Sen. Bam Aquino, Win Gatchalian, Risa Hontiveros, Panfilo Lacson, Lito Lapid, Kiko Pangilinan, Raffy Tulfo, Erwin Tulfo at Tito Sotto.
**
Nagpulong ngayong araw sina Pangulong Ferdinand Marcos Jr. at ang bumibisitang si Paraguay President Santiago Peña sa Malacañang upang palakasin ang ugnayan ng dalawang bansa sa kalakalan, pamumuhunan, at agrikultura.
Dumating si Peña sa Pilipinas noong Mayo 10 mula Taipei at sinalubong ng mga opisyal ng pamahalaan sa Ninoy Aquino International Airport.
Bago ang pagpupulong sa Malacañang, nag-alay siya ng bulaklak sa Luneta bilang bahagi ng opisyal na seremonya.
Ayon sa Malacañang, inaasahang lalagda ang dalawang lider ng mga kasunduan na magpapalawak ng kooperasyon sa iba’t ibang sektor.
**
Nanawagan si Parañaque City 2nd district Rep. Brian Yamsuan sa Kamara na pabilisin ang pagpasa ng panukalang batas na magbibigay ng mas abot-kaya at komprehensibong early detection at intervention services para sa mga batang may autism at iba pang special needs.
Sa ilalim ng House Bill No. 6309, layunin ng panukala na palawakin ang access sa screening, therapy, at medical support para sa mga batang may developmental conditions gaya ng autism, ADHD, Down Syndrome, cerebral palsy, at learning disabilities. Kasama rin sa panukala ang paglikha ng scholarship programs para sa mga estudyanteng kukuha ng kursong may kaugnayan sa espesyal na edukasyon at therapy services.