Kinumpirma ng Palasyo ng Malakanyang na pormal ng hihilingin ni Pangulong Ferdinand Marcos Jr. sa Kongreso na pagkalooban siya ng emergency powers para bawasan ang excise tax sa mga produktong petrolyo sa gitna ng krisis sa Middle East.
Ayon kay Palace Press Officer USec. Claire Castro, ang Department of Energy (DOE) ang magsusumite ng formal request sa Kongreso bilang kinatawan ng Pangulo dahil siya ay nasa New York para sa dalawang araw na working visit.
Inaasahang isusumite ngayong araw ng Lunes, Marso 9 ang nasabing formal request.
Kung maaala, sinabi ni Pangulong Marcos na makikipag-usap siya sa mga lider ng Kongreso upang mabigyan ng kapangyarihan ang pangulo na bawasan ang excise tax sa mga produktong petrolyo sakaling tumaas ang presyo ng Dubai crude oil sa mahigit $80 kada bariles.
Ayon kay Marcos, ito ay magiging emergency measure na ipatutupad agad kapag natapos ang sigalot sa Middle East.
**
Inaprubahan ng Department of Education (DepEd) ang apat (4) na araw na workweek para sa non-teaching personnel na magtrabaho onsite kada linggo simula ngayong Lunes, Marso 9, 2026.
Ayon sa inilabas na memorandum ni Education Secretary Sonny Angara noong Marso 8, itatalaga ang Biyernes bilang karaniwang work-from-home day para sa lahat ng sakop ng patakaran.
Kasunod ito ng direktiba ni Pangulong Ferdinand Marcos Jr. na magpatupad ng energy conservation measures sa lahat ng tanggapan ng gobyerno dahil sa tumataas na presyo ng langis kaugnay ng sigalot sa Middle East.
Ang patakaran ay sumasaklaw sa non-teaching at related-teaching personnel, pati na ang mga contract-of-service at job order employees, habang ang mga guro ay magpapatuloy naman sa kanilang regular na klase at iba pang aktibidad.
Kasabay ng apat na araw na onsite arrangement, iniutos din ng DepEd ang mga hakbang sa pagtitipid ng enerhiya upang mabawasan ang konsumo ng kuryente at gasolina ng 10% hanggang 20%.