Nangako si North Korean leader Kim Jong Un na palalawakin pa ang nuclear arsenal ng bansa.
Sa isang talumpati, idineklara ng North Korean leader na layunin niyang maging military superpower at tutumbasan ang mga banta ng Amerika.
Iginiit ni Kim na hindi na kailanman magbabago ang posisyon ng North Korea bilang isang nuclear-armed state.
Nangako rin siyang palalakasin pa ang nuclear deterrent para sa pagdepensa sa kanilang bansa.
Binanggit din niya ang paglaban sa mga “hostile forces,” kung saan tinawag niya ang South Korea na “most hostile state” na tutumbasan ng matinding tugon.
Nauna na ngang nagpasa ang North Korea ng batas na nagpapahintulot ng preemptive nuclear strike sakaling may banta sa kanilang bansa.
Ang pahayag ng North Korean leader ay bahagi ng patuloy na pagpapatibay ng North Korea sa kanilang nuclear policy, sa kabila ng mga international sanctions.
---
Nagresulta sa matinding trahedya ang pagbagsak ng isang C-130 Hercules military transport plane ng Colombian Air Force sa Puerto Leguízamo, Putumayo noong Marso 23, 2026.
Ayon sa gobernador ng rehiyon, hindi bababa sa 34 katao ang nasawi habang mahigit 110 sundalo at tauhan ang sakay ng eroplano.
Bumagsak ito ilang sandali matapos ang paglipad at nagdulot ng napakalaking sunog na nagpalubha sa sitwasyon.
Agad na rumesponde ang mga residente, militar, at emergency teams upang iligtas ang mga pasahero at apulahin ang apoy, habang dose-dosenang sugatan ang isinugod sa mga ospital.
Patuloy ang imbestigasyon ng mga awtoridad upang matukoy ang sanhi ng aksidente, na nagbunsod ng mga tanong hinggil sa kaligtasan at maintenance ng lumang fleet ng militar ng Colombia.
Ang insidente ay isa sa pinakamalalang pagbagsak ng eroplano sa bansa nitong mga nakaraang taon, na nagbigay-diin sa panganib ng operasyon sa liblib na Amazon region at sa hamon ng mabilis na pagtugon sa mga emerhensiya.