Humingi ng suporta sa mga lokal na pamahalaan ang isang grupo na kontra sa ilegal na sugal para paigtingin pa ang kampanya upang mapanatiling malaya ang lokalidad mula sa mga gawaing sumisira sa moral na pundasyon ng mga komunidad.
“Hindi sapat ang mga operasyon ng pulisya na nagreresulta sa ilang pag-aresto kung wala ang buong suporta ng pamahalaan,” ayon sa lumalaking kilusang nakatuon sa turismo, na binanggit ang lumalawak na presensya ng mga ilegal na sugal gaya ng color games, “drop ball,” at iba pang hindi awtorisadong pustahan.
Ayon kay Voltaire Tolentino, tagapagtatag ng Fight Against Illegal and Rigged Games (F.A.I.R. Games), matapos ang bawat pag-aresto ay muling bumabalik ang mga ilegal na aktibidad ilang sandali lamang pagkatapos ng aksyon ng mga awtoridad.
Partikular itong nanawagan sa Kapitolyo ng Pangasinan at iba pang lokal na pamahalaan sa karatig-probinsya na suportahan ang tuloy-tuloy na pagpapatupad ng batas laban sa walang humpay na operasyon ng ilegal na sugal.
Si Tolentino ay kilalang tagapagtaguyod ng lokal na turismo at isa sa mga nangungunang content creator ng Pangasinan. Kinilala siya sa kanyang makabuluhang digital na mga salaysay, lalo na sa pagpapalaganap ng mga destinasyong panturista ng probinsya.
Layunin niyang hikayatin ang kabataan na magpakasangkot sa makabuluhang gawain at ilayo sila sa mapanganib at walang saysay na aktibidad gaya ng ilegal na sugal.
Binigyang-diin niya na may mga umiiral na batas na malinaw na naghihiwalay sa legal at ilegal na sugal, at dapat igabay ng pamahalaan ang atensyon ng tao sa mga pinapahintulutang aktibidad upang matiyak ang tamang pagpapatupad at pananagutan.
Binanggit din nito ang pagkakaroon ng awtorisadong Small Town Lottery (STL).
Ang sistemang STL, na pinamamahalaan ng Philippine Charity Sweepstakes Office (PCSO), ay nilikha upang magbigay ng legal na alternatibo sa mga ilegal na numbers game. Sa Pangasinan, ang operasyon ay kasalukuyang naka-franchise sa Grand 88 Corporation.
Wala umanong pakundangan isinasagawa niti ang mga ilegal na aktibidad na umaakit sa mga kalahok gaya ng mga drayber ng traysikel at mga manggagawang arawan, na inaalis sila sa kanilang mas produktibong hanapbuhay.
Inaasahang ipagpapatuloy ng mga awtoridad ang pagpapatupad ng Presidential Decree No. 1602, na nagpaparusa hindi lamang sa mga operator at mananaya kundi pati na rin sa mga indibidwal na nagbibigay-proteksyon o tumutulong sa ilegal na sugal.
May mga kahalintulad na insidente rin sa mga karatig-probinsya, kung saan nahuli ang mga suspek na umano’y konektado sa mga ilegal na gambling network.
Itinatag ang STL upang sugpuin ang ilegal na numbers game gaya ng Jueteng. Inalok ito bilang legal na alternatibo at kasabay na nakalikha ng pondo para sa mga programang panlipunan ng pamahalaan.
Sa kabila nito, binanggit ni Tolentino na patuloy pa ring umiiral ang mga ilegal na bookies at hindi lisensyadong laro kasabay ng STL, na bumubuo ng tinawag niyang “parallel gambling economy” na sumasalungat sa layunin ng sistema.