Tiniyak ni Pangulong Ferdinand “Bongbong” Marcos Jr. na nananatiling sapat ang suplay ng pagkain, petrolyo, at fertilizer sa bansa sa kabila ng umiiral na tensiyon sa pandaigdigang merkado.
Ayon sa Pangulo, nananatili ring normal ang presyo ng mga pangunahing bilihin at produktong petrolyo kumpara sa mga nakaraang linggo.
Aniya, patuloy ang pakikipagtulungan ng mga vendor upang mapanatili ang presyo, kaya hindi na kailangan na mag hoard at mag panic ang publiko.
Binigyang-diin din ni Pangulong Marcos na ang pangunahing hakbang ng pamahalaan upang matulungan ang mga Pilipino, kabilang ang mga drivers ay panatilihing matatag ang presyo at suplay ng langis.
**
Nanganganib na maibasura ang inihain na reklamo laban kay Senator Ronald Bato dela Rosa kaugnay ng kanyang patuloy na pagliban sa trabaho maliban na lamang kung aamyendahan ang panuntunan ng mataas na kapulungan.
Ayon kay Senate Committee on Ethics and Privileges Chairman Senator JV Ejercito nitong Miyerkules, walang probisyon patungkol sa no work, no pay sa ilalim ng kasalukuyang rules of the Senate o maging sa kanyang komite.
Upang umusad ang kaso, paliwanag ng mambabatas na kailangan muna itong imungkahi ng isang senador upang pormal na maisama ang polisiya sa kanilang mga panuntunan bago muling ihain ang reklamo.
Nilinaw din ni Ejercito na diringgin ng komite ang mga kaso base sa first in, first out na sistema.
***
Mahigit 180,000 tauhan ng Philippine National Police (PNP) ang ipapakalat sa iba’t ibang panig ng bansa upang tiyakin ang kapayapaan at magbigay ng tulong sa mga komyuter sa gaganaping nationwide transport strike ngayong Huwebes, Marso 19.
Sa isang pahayag, ipinaliwanag ni PNP spokesperson Police Brigadier General Randulf Tuaño na ilalabas ng pambansang pulisya ang malaking bahagi ng kanilang pwersa bilang paghahanda sa malawakang kilos-protesta.
Bukod sa pagpapanatili ng kaayusan, bibigyang-prayoridad din ng pulisya ang pag-alalay sa mga pasaherong posibleng maapektuhan ng tigil-pasada.