Pinabulaanan ng Malacañang ang pahayag ni Vice President Sara Duterte na galit ang buong sambayanang Pilipino sa pag-aresto at pagpapadala kay dating Pangulong Rodrigo Duterte sa The Hague, Netherlands upang harapin ang International Criminal Court (ICC).
Ayon kay Communications Undersecretary Claire Castro, natural lamang ang naging reaksyon ng bise presidente bilang anak ng akusado.
Subalit binigyang-diin ng opisyal na kabaligtaran ang sentimyento ng mga biktima ng extrajudicial killings o EJK, pati na ng mga tagapagsulong ng human rights, na matagal nang humihingi ng pananagutan.
Ipinunto ng Palasyo na ang naging hakbang ng pamahalaan ay direktang tugon sa mga Pilipinong naghain ng complaint sa ICC matapos makaramdam ng kawalan ng hustisya sa ilalim ng nakaraang administrasyon.
**
Tiniyak ng Department of Foreign Affairs (DFA) na mananatiling bukas ang kanilang komunikasyon para sa publiko, partikular sa mga nangangailangan ng tulong na Overseas Filipino Workers (OFWs), kasabay ng pormal na pagsisimula ng kanilang adjusted work schedule ngayong araw.
Ito ay matapos ipatupad ng ahensya ang 4-day on-site work schedule para sa kanilang mga kawani mula Lunes hanggang Huwebes. Samantala, iiral naman ang Work From Home (WFH) o off-site remote work arrangement tuwing araw ng Biyernes.
Ang pagbabago sa iskedyul ng trabaho sa DFA ay direktang pagtalima sa kautusan ni Pangulong Ferdinand R. Marcos Jr. sa lahat ng tanggapan ng pamahalaan na magpatupad ng mga kaukulang hakbang upang makatipid sa konsumo ng enerhiya ng bansa.
Kabila ng pagkawala ng mga kawani sa opisina tuwing Biyernes, nilinaw ng kagawaran na patuloy na tatanggap ng tawag ang kanilang trunkline.
**
Bumagsak ang Philippine peso pabalik sa P59:$1 nitong Biyernes, Marso 13, matapos ang siyam (9) na araw na pagbaba kontra dolyar, ayon sa datos ng Bankers’ Association of the Philippines (BAP).
Nagtapos ang piso sa P59.735:$1, mas mataas ng 35 centavos mula sa P59.385 noong Huwebes, Marso 12, 2026.
Nabatid na ang pagbaba ng piso ay dulot parin ng kombinasyon ng mas mataas na presyo ng langis, mas malakas na dolyar, at muling pag-iingat ng mga mamumuhunan dahil sa geopolitical tensions.
Kasabay pa nito ang tumataas na presyo ng enerhiya at trade deficit, habang ang global uncertainty ay nagtutulak ng pondo sa mga safe haven tulad ng dolyar.
Maaaring bunga rin daw ito ng “mixed signals” mula sa administrasyon ni U.S. President Donald Trump at ng kamakailang datos sa foreign direct investments (FDI) ayon sa mga eksperto.