Suportado ni House Speaker Faustino “Bojie” G. Dy III ang panukalang batas na naglalayong magtatag ng isang nationwide Integrated Emergency Medical Services System (EMSS) upang matiyak ang mabilis, maayos, at de-kalidad na medikal na pagtugon sa bansa.
Ito ay matapos aprobahan ng House Committee on Health ang konsolidasyon ng siyam na panukalang batas na naglalayong gawing institusyonal ang EMSS sa pambansa, rehiyonal, at lokal na antas.
Ayon kay Committee Chair at Batanes Rep. Ciriaco Gato Jr., bagamat may pambansang emergency hotline na isang dekada na ang nakalilipas, kulang pa rin ang bansa sa isang pinag-isang sistema.
Ang kasalukuyang hiwa-hiwalay na sistema ay nagiging sanhi ng mabagal na response time at mga kamatayan na maaari sanang maiwasan.
Sa ilalim ng bagong panukala, magkakaroon ng iisang pambansang pamantayan sa pagsasanay ng mga responder, emergency transport, koordinasyon sa mga ospital, at regulasyon ng mga ambulansya.
**
Nagpakalat ang Philippine National Police (PNP) ng karagdagang mga pulis sa Senado bilang paghahanda sa posibeng paglulunsad ng mga kilos-protesta sa gitna ng political tensions.
Sa isang pahayag, sinabi ni PNP chief Gen. Melencio Nartatez Jr. na ang kanilang deployment ay “mahigpit na pag-iingat at proaktibo.”
Saad pa ng hepe ng pambansang pulisya na tataasan ng PNP ang police visibility sa paligid ng Senado at karatig na government facilities kasabay ng patuloy na pangamba sa posibleng mga protesta at public disturbances bunsod ng mga tensiyon sa pulitika.
Una rito, ilang mga grupo ang nagprotesta sa labas ng Senado para suportahan ang panawagan ng minority senators para sa pagbibitiw ni Sen. Alan Peter Cayetano bilang Senate President.
Kaugnay ng mga kamakailang kaganapan sa Senado, inatasan na ni Gen. Nartatez ang National Capital Region Office na palawigin pa ang kanilang police visibility at maglatag ng checkpoints sa palibot ng premises ng kapulungan.
Ipatutupad ng Social Security System (SSS) ang ikalawang tranche ng Pension Reform Program (PRP), na magbibigay ng dagdag-pensiyon sa mga retirado at iba pang benepisyaryo ng ahensya.
Sa ilalim ng ikalawang tranche, makatatanggap ng 10 porsiyentong dagdag sa kanilang buwanang pensiyon ang mga retirement at disability pensioners, habang 5 porsiyentong dagdag naman ang matatanggap ng mga death at survivorship pensioners.
Layunin ng programa na matulungan ang mga pensioner na makasabay sa pagtaas ng presyo ng mga bilihin at iba pang hamong pang-ekonomiya.
Ayon sa PRP, magkakaroon ng taunang dagdag-pensiyon tuwing Setyembre mula 2025 hanggang 2027.