Jun 29, 2026 | 8:00 AM
Umabot sa 10 dayuhan, kabilang ang apat na Israeli, ang inaresto ng mga tauhan ng Bureau of Immigration (BI) sa isinagawang operasyon sa General Luna, Surigao del Norte.
Ayon sa BI, nahuli ang mga dayuhan dahil sa paglabag sa mga batas ng Immigration gaya ng undesirability, overstaying, at pagtatrabaho nang walang kaukulang permit.
Bukod sa apat na Israeli, kabilang din sa mga inaresto ang dalawang Chinese, isang Lithuanian, isang Australian, isang Moroccan, at isang Nigerian.
Kasalukuyan silang nasa pansamantalang kustodiya ng General Luna Municipal Police Station habang hinihintay ang kanilang paglilipat sa Immigration detention facility.
***
Posibleng maging pinakamahabang impeachment trial sa kasaysayan ng bansa ang paglilitis laban kay VP Sara Duterte, ayon kay Senate Secretary Renato Bantug.
Batay sa pagtaya ng impeachment clerk of court, maaaring umabot sa pitong buwan ang trial, dahil tatlong araw kada linggo ang target na iskedyul ng paglilitis.
Ang pitong-buwang projection, ayon kay Bantug, ay nakabatay sa 92 trial days na hiningi ng House Prosecution Panel at 30 araw na hiningi ng Defense Panel upang maipresenta ng dalawang panig ang kanilang ebidensiya at mga testigo.
Gayunpaman, posible pa rin aniyang mapapaikli ang proseso kung mas maraming witness ang maipresenta bawat araw.
Kung ikukumpara sa mga nakaraang impeachment trial, umabot lamang sa 44 araw ang paglilitis kay dating Chief Justice Renato Corona noong 2012.
Samantala, ang naunang trial laban kay dating Pangulong Joseph Estrada noong 2001 ay tumagal lamang ng 23 araw, matapos mag-walkout ang House Prosecution Panel dahil tumanggi noon ang Senate Impeachment Court na buksan ang tinaguriang “second envelope.”
**
Maglulunsad ang Senate Committee on Social Justice, Welfare, and Rural Development ng malalimang pag-aaral sa Juvenile and Welfare Act.
Ayon sa chairman ng komite na si Sen. Erwin Tulfo, kabilang sa mga pag-aaralan ang kakulangan ng Bahay Pag-asa facilities para sa Children in Conflict with the Law at kung dapat na panagutin ang mga magulang para sa mga paglabag ng kanilang mga anak.
Bukod dito, pag-aaralan din ng panel ang minimum age of criminal responsibility na kasalukuyang nasa 15 anyos, kung ito ba ay nananatiling realistic.
Ibinahagi rin ng senador na bago pa man siya naging isang public servant, nasaksihan niya ang malupit na katotohanan ng Juvenile law. Aniya sa loob ng maraming taon, may mga biktima ng krimen na kagagawan ng mga menor de edad ang walang magawa dahil sa pagpapatupad ng Juvenile Law.