Aarangkada ngayong araw ng Martes ang malakihang rollback sa presyo ng produktong petrolyo, ayon sa Department of Energy (DOE).
Sa abiso ng DOE, malaki ang ibababa ng presyo ng iba’t ibang produktong petrolyo kung saan bababa ng P9.26 kada litro ang diesel, P4.76 kada litro sa gasolina, at P10.86 para sa kada litro ng kerosene.
Ayon kay Energy Secretary Sharon Garin, bahagyang bumabalik ang presyo sa mas mababang antas matapos ang mga nakalipas na pagtaas na dulot ng tensyon sa pandaigdigang merkado ng langis.
“We’re going closer to the pre-war prices,” ani Garin, na tinutukoy ang epekto ng tensyon sa Gitnang Silangan.
--
Aminado ang Department of Education (DepEd) sa krisis sa literacy sa bansa matapos lumabas sa isang assessment na 87 porsyento ng mga Grade 11 students na hirap paring unawain ang kanilang binabasa.
Ayon sa DepEd, ang naturang bilang ay indikasyon ng matagal nang learning gaps system ng edukasyon sa Pilipinas at hindi lamang sa problema ng senior high school.
Sa pahayag ni DepEd Undersecretary for Learning Systems Carmela Oracion, iginiit niyang seryoso ang ahensya sa lumabas na resulta mula sa Second Congressional Commission on Education (EDCOM 2).
Ipinaliwanag ng opisyal na ang problema sa kakayahan sa pagbasa ay naipon mula pa sa mga unang baitang at lumala sa paglipas ng panahon dahil sa iba’t ibang salik gaya ng kahirapan, kakulangan sa learning materials, limitadong suporta sa tahanan, mga pagkaantala sa klase, at epekto ng pandemya.
**
Isinusong ni Senador Erwin Tulfo na gawin ng libre ang professional examinations fees ng mga kwalipikadong indigents, bilang tulong sa pagkamit nila ng lisensya sa propesyong tinahak.
Sa kanyang Senate Bill No. 2035 o “Free Professional Examinations Act,” gagawing exempted ang mga kwalipikadong indigents mula sa pagbabayad ng exam fees.
Dagdag pa ng Senador, napipigilan ng mga sandamakmak na professional exam fees di lang ang pag-unlad ng mga Pilipino, kundi ang pag-usbong ng bagong henerasyon ng mga propesyunal sa bansa.
Kasali sa “Free Professional Exams Act” ni Tulfo ang Professional Regulations Commission (PRC) Board Exams, Civil Service Eligibility Exams, at Bar Exams.
Sa nasabing panukala, ang kwalipikadong indigent ay yung idedetermina ng Department of Social Welfare and Development (DSWD). Ang ahensya ang siyang magbibigay ng sertipikasyon para maipresenta sa Professional Regulations Commission, Civil Service Commission, o Supreme Court.