Nagsampa ng kasong kriminal ang Bureau of Internal Revenue (BIR) sa Department of Justice laban kay Alice Leal Guo dahil sa umano’y tax evasion at kabiguang magsumite ng Annual Income Tax Returns mula 2019 hanggang 2023.
Tinatayang mahigit P1.008 bilyon ang kakulangan sa buwis, kasama ang surcharges at interes.
Ang kaso ni Guo ang pinakamalaki sa limang kasong kriminal na isinampa ng BIR noong Hunyo 11, 2026, na may kabuuang tinatayang P1.46 bilyon na tax deficiency.
Batay sa imbestigasyon, lumabas na si Guo ay may malalaking ari-arian, sasakyan, helicopter, bank transactions, at investments sa iba’t ibang korporasyon, ngunit hindi nagsumite ng income tax returns sa loob ng limang taon.
Ginamit ng BIR ang expenditure method upang tukuyin ang kanyang kita at natuklasan na may malaking undeclared income.
Si Guo ay kinasuhan sa ilalim ng Section 254 ng National Internal Revenue Code (NIRC) para sa Attempt to Evade or Defeat Tax at Section 255 para sa Failure to File Return and Pay Tax.
**
Naghain si Sen. Robin Padilla ng isang resolusyon na naglalayong magsagawa ng imbestigasyon ang Senado kaugnay sa pagkasawi ng dalawang student-athletes ng Ateneo de Manila University sa isang team-building activity sa Dipaculao, Aurora.
Ayon kay Padilla, mahalagang masuri kung sapat ang umiiral na mga polisiya, supervision requirements, emergency preparedness measures at risk management protocols para matiyak ang kaligtasan ng mga estudyanteng kalahok sa mga aktibidad na inorganisa ng mga paaralan.
Sa ilalim ng panukalang resolusyon, hihilingin sa kaukulang komite ng Senado na magsagawa ng motu proprio inquiry upang alamin ang buong pangyayari at matukoy kung may mga batas na kailangang amyendahan o ipatupad upang mapalakas ang proteksyon sa mga estudyante.
Binigyang-diin ng senador na hindi layunin ng imbestigasyon na agad magturo ng may pananagutan kundi alamin ang katotohanan at matiyak na may mga repormang maipatutupad upang hindi na maulit ang kahalintulad na insidente.
**
Pormal nang ipinakilala ng House Prosecution Panel ngayong araw ang unang batch pangkat ng mga beteranong private prosecutors na magiging katuwang sa gaganaping impeachment trial ni Vice President Sara Duterte sa Senado.
Ayon kay House Committee on Justice Chairperson at lead prosecutor Gerville “Jinky Bitrics” Luistro, binubuo ang unang batch ng mga kilalang litigator, dating opisyal ng gobyerno, at mga legal academic na nagboluntaryong magsilbi nang pro bono o walang bayad.
Kabilang sa mga ipinakilalang abogado sina dating assistant presidential legal counsel Marforth T. Fua ng PECABAR Law, veteran trial lawyer Lorna Kapunan ng Kapunan and Castillo Law Offices, at UP College of Law lecturer Amando Virgil Ligutan ng SALiGAL Law.