Ibinasura ng Kataas-taasang Hukuman ang petisyon ng isang guro na humihiling na kilalaning “valid” ang quorum ng 12 senador sa gitna ng usapin sa pagbabago ng liderato ng Senado.
Sa En Banc Session ng Korte Suprema ngayong araw, inaksyunan ang petisyon ni John Barry Tayam na inihain kamakailan.
Ipinaliwanag ng hukuman na ang pagbabasura ay bunsod ng kawalan ng legal standing ng petisyuner sa naturang isyu.
Ayon sa Korte Suprema, nabigong mapatunayan ni Tayam na siya ay direktang naapektuhan o nagdulot ng pangamba sa kanya ang idinulog na usapin.
Sa kanyang inihaing Petition for Certiorari, hiniling ng guro na maresolba ang kontrobersya sa Senado kaugnay ng botohan at ideklarang sapat ang bilang na 12 senador para sa quorum na kinakailangan upang maisagawa ang sesyon noong Hunyo 3.
Naniniwala si Tayam na mahalagang mabigyan ito ng linaw upang magpatuloy ang Senado sa pagtupad ng mandato nito sa paggawa ng batas.
Gayunpaman, dahil sa kawalan ng legal standing ng guro sa naturang usapin, nabasura ang kanyang petisyon.
Ipinahayag naman ni Tayam na kanyang pag-aaralan ang susunod na hakbang na maaari pang gawin alinsunod sa desisyon ng hukuman.
---
Apektado ng landslide at ground deformation ang ilang tourism sites sa Mindanao matapos ang magnitude 7.8 na lindol noong Lunes, Hunyo 8, 2026.
Kaugnay nito, naglabas ng opisyal na abiso ang Department of Tourism (DOT) ukol sa mga pinsala at suspensiyon ng aktibidad sa mga sumusunod na rehiyon
Sa Soccsksargen (Region 12), nakapagtala ng ground deformation sa Brgy. Ladol, Alabel, Saranggani kung saan gumuho ang maraming cottages sa Ladol Beach Resort dahil sa paggalaw ng lupa.
Nagkaroon naman ng landslide sa Mt. Melibengoy malapit sa Lake Holon sa bayan ng T’boli, South Cotabato. Ligtas namang nailikas ang lahat ng turista pababa ng bundok.
Sa General Santos City, limang accommodation establishments ang nagtamo ng iba’t ibang pinsala.
Sa Davao Region (Region 11), pansamantalang sinuspendi ang ilang turismo at aktibidad para sa kaligtasan ng publiko habang gumagawa ng safety assessment
Kung saan sa Davao City, kinansela muna ang pagdaraos ng Reyna ng Davao 2026. Sa Davao Oriental, tigil-operasyon ang mga EcoPark, coastal tourism, at mga water activities. Sa Davao Occidental, suspendido ang pagdiriwang ng Masbol Festival sa bayan ng Sarangani.
Sa ngayon, pansamantalang isinara ang Lake Holon at lahat ng kaugnay na aktibidad sa turismo. Agad na nagsagawa rin ng rapid field validation ang mga awtoridad upang suriin ang mga banta at imonitor ang kaligtasan sa mga apektadong lugar.
Hinihimok naman ng DOT ang publiko na i-monitor ang mga advisory ng mga airline, ferry, at bus bago bumiyahe. Makipag-ugnayan din sa mga hotel at tour operator para sa status ng operasyon, rebooking, o kanselasyon.
Nagpaabot din ng pakikiramay ang DOT sa lahat ng pamilya at komunidad na naapektuhan ng naturang sakuna.