Ibinasura ng Sandiganbayan Third Division ang mosyon ni dating Senador Ramon “Bong” Revilla Jr. na pansamantala siyang makalabas ng bilangguan para makadalo sa burol ng yumao niyang kapatid na si Jojo Manungas Bautista.
Ayon sa anti-graft court, bagaman nakikisimpatiya ito kay Revilla at kaniyang pamilya, tungkulin ng korte na tiyaking consistent sa obligasyon nito ang bawat inilalabas na pasya o hatol.
Sinabi ng korte na ang urgent motion for furlough na inihain ni Revilla ay hindi maikokonsiderang emergency o compelling circumstance para mapayagan siyang pansamantalang makalabas.
Tinukoy din ng korte ang matin¬ding seguridad na kailangang ibigay ng Philippine National Police (PNP) at Bureau of Jail Management and Penology (BJMP) kapag papayagang makalabas si Revilla.
Maliban dito, kung papayagan ang mosyon ng dating senador, sinabi ng Sandiganbayan na maaaring isipin ng publiko na binibigyan siya ng pabor ng korte bilang isang dating mataas na opisyal ng gobyerno.
“It would also unduly create an impression on the public that accused, being a former high-ranking public official, is a favored detainee over and above other similarly situated detainees,” ayon sa resolusyon.
Si Revilla, nakakulong sa New Quezon City Jail sa Payatas, Quezon City, ay nahaharap sa kasong malversation at graft kaugnay ng umano’y “ghost” flood control project sa Pandi, Bulacan.
---
Hiniling ni Vice President Sara Duterte sa Korte Suprema nitong Martes, Hulyo 7, na ipatigil ang isinasagawang impeachment trial sa Senado.
Sa kanyang urgent motion and manifestation kaugnay ng dalawang nakabinbing petisyon na inihain ng kanyang legal team na pinamumunuan ni Atty. Israelito Torreon, kinuwestyon ni Duterte ang kapangyarihan ni Sen. Francis “Chiz” Escudero na mamuno sa Impeachment Court bilang presiding officer.
Hiling niya sa SC na magpalabas ng injunction o interim relief upang pigilan ang Impeachment Court at mga opisyal nito na ipagpatuloy ang paglilitis, tumanggap ng ebidensya, maglabas ng kautusan, at magpatupad ng proseso hanggang maresolba ang isyung konstitusyonal hinggil sa awtoridad ng presiding officer.
Giit ni Duterte, dapat tiyakin na ang impeachment trial ay magpapatuloy lamang sa ilalim ng Rules of Procedure on Impeachment Trials na “validly adopted” at pinamumunuan ng presiding officer na may malinaw at ligal na kapangyarihan, upang maiwasan ang pagdududa sa bisa ng proseso. Ipinunto niya na ang mga amyenda sa Rules of Procedure na inaprubahan umano noong Hunyo 3, 2026 ay may depekto dahil walang quorum, walang advance notice na hinihingi ng Senate Rules, at hindi mismong Impeachment Court ang nagpatibay ng pagbabago.
Iginiit pa ni Duterte na ang Impeachment Court na pinamumunuan ni Escudero ay produkto ng sesyon noong Hunyo 3, 2026—na siya ring kinukuwestyon sa naunang petisyon.
“A respondent in an impeachment case is entitled not merely to a trial, but to a trial before the constitutionally proper impeachment tribunal, presided over by an officer whose authority is lawfully derived,” ani Duterte sa kanyang mosyon.