Naibalik na sa Bureau of Internal Revenue (BIR) ang kontrobersiyal na green box na naglalaman ng tax records nina Vice President Sara Duterte at asawang si Atty. Manases Carpio.
Ang naturang box ay dating ipinasakamay sa House of Representatives at tuluyan ding ipinasa sa Senado upang maging ebidensiya sana ng House Prosecution Panel laban kay VP Sara sa impeachment trial.
Unang ipinag-utos ni Sen. Francis “Chiz” Escudero ang pagbabalik ng naturang box sa BIR dahil walang court order na nag-uutos para sa ligal na paglilipat ng kustodiya nito patungo sa Senado.
Pinangunahan ni Senate Secretary and concurrent clerk of court Renato N. Bantug Jr. sa pamamagitan ng Office of the Sergeant-at-Arms (OSAA) ang pagbabalik sa naturang box sa BIR Office sa Quezon City ngayong araw, July 7, 2026.
Kasama ng mga ito ang ilang police escort.
---
Nagsimula ang presentasyon ng mga testigo sa ikalawang araw ng impeachment trial ni Vice President Sara Duterte matapos iharap ng House prosecution ang unang witness na si John Mark Calilung ng National Bureau of Investigation Cybercrime Division.
Tinalakay ni Calilung ang proseso ng pagpreserba at pag-authenticate ng video ng online press conference ni Duterte noong Nobyembre 23, 2024 na ginagamit ng prosecution bilang ebidensya sa artikulo ng grave threats.
Paulit-ulit namang tumutol ang depensa sa testimonya at sa mga dokumentong iniharap, ngunit ibinasura ni presiding officer Sen. Chiz Escudero ang karamihan sa mga objection upang magpatuloy ang pagdinig.
---
Tiniyak ng Quezon City Health Office na walang dapat ikabahala sa tumataas na bilang ng COVID-19 cases sa lungsod, sa kabila ng naitalang pag-akyat ng mga kaso sa nakalipas na dalawang linggo.
Ayon sa City Epidemiology and Surveillance Division ng Quezon City Health Office, mula sa 23 kaso ay umakyat sa 84 ang kumpirmadong na-infect sa loob lamang ng dalawang linggo—katumbas ng higit 200% na pagtaas.
Umabot naman sa kabuuang 146 kaso ang naitala sa lungsod para sa taong 2026.
Ayon pa sa opisyal, ang pagtaas ng kaso ay dapat ituring bilang paalala sa publiko na patuloy na mag-ingat, dahil patuloy parin ang pag-kalat ng virus na SARS-CoV-2.
Naitala ang pinakamataas ang bilang ng kaso sa District 4 at District 1 ng Lungsod, ngunit nilinaw ng QC na hindi ito nangangahulugang may localized cluster outbreak sa mga lugar.
Karamihan din daw sa mga kasong naitala ay mild lamang, at posibleng mas marami pa ang may impeksiyon ngunit hindi pa natutukoy dahil hindi nagpapa-check-up.
Samantala, ipinapaalala ng mga eksperto na kasabay ng tag-ulan ay madalas ding tumataas ang mga influenza-like illnesses kaya mahalaga ang patuloy na pag-iingat tulad ng paghuhugas ng kamay at pagsusuot ng face mask kapag may sintomas.