Binigyang-diin ng Department of Finance (DOF) at Bureau of Internal Revenue (BIR) na mayroon nang ipinapatupad na tax relief measures bago pa man ang ikalimang State of the Nation Address (SONA) ni Pangulong Ferdinand R. Marcos Jr.
Maaalalang ang tax relief measures ay isa sa mga tinukoy ng pangulo sa kaniyang Ulat sa Bayan, na malugod ding tinanggap ng publiko.
Ayon sa DOF at BIR, umiiral na ang ilang tax measures na nagbibigay ginhawa sa mga manggagawa, maliliit na negosyo, at iba pang uri ng taxpayers.
Kabilang dito ang One-Time Tax Abatement Program for Micro Taxpayers, na ipinatupad sa ilalim ng Revenue Regulations (RR) No. 4-2026 mula pa noong June 22, 2026.
Sa ilalim nito, maaaring makinabang ang mga kwalipikadong micro taxpayers sa pag-alis o pagbabawas ng kanilang mga hindi pa nababayarang obligasyon sa buwis at kaukulang penalties.
Nagpahayag din ang dalawang opisina ng kanilang kahandaang suportahan ang isinulong ng kasalukuyang administrasyon na tax relief para sa mga middle class habang patuloy na bumabangon ang ekonomiya.
Inihayag din ng mga ito ang kanilang pagnanais na tumulong para sa paggawa ng mga panukalang batas o polisiya na makakapagpagaan sa pasanin sa pagbubuwis ng mga Pilipinong taxpayer.
---
Inirekomenda ng Philippine Energy Research & Policy Institute (PERPI) na higpitan ang regulasyon ng Energy Regulatory Commission (ERC) sa pagtatakda ng singil sa system loss charges.
Ito ay kung ituloy man ang pag-amyenda sa Electric Power Industry Reform Act of 2001 o EPIRA Law, tulad ng panawagan ni Pangulong Ferdinand Marcos Jr. sa kaniyang ikalimang Ulat sa Bayan.
Ayon kay PERPI Executive Board Member Atty. Jay Layug, dapat ay limitahan ang saklaw ng mga sisingilin sa mga consumer at hindi ipinapasa sa kanila ang iba’t-ibang bayarin, hindi tulad ng nakasaad sa EPIRA.
Sa aspeto naman ng non-technical component, tiniyak din ng ahensiya ang kahandaan na tumulong sa pamahalaan upang masugpo ang pagnanakaw ng kuryente sa iba’t-ibang lugar, dahil sa mga illegal connection.
Ayon kay Atty. Layug, handa ang PERPI na tumulong para ma-amyendahan ang EPIRA Law at unti-unting mabago ang power service sa bansa.
Naniniwala ang opisyal na may kakayahan at potensiyal ang kasalukuyang administrasyon na amyendahan ang EPIRA Law at tulungan ang mga consumer na mapababa ang power bills.
Aniya, kapag tuluyan nang naipatupad nang mahigpit ang pagpapababa sa mga dagdag-singil sa kuryente, tiyak na makikinabang ang mga ordinaryong konsyumer at mababawasan ang mga kaso ng illegal tapping na isa sa mga pangunahing problema sa bansa.