Hinamon ni Philippine Coast Guard (PCG) spokesperson Rear Admiral Jay Tarriela ang mga senador, partikular ang mga bumatikos sa kanya noon, na atasan ang China na humingi ng paumanhin sa sambayanang Pilipino.
Ito ay matapos maglabas ang China Daily, isang state-run media ng Beijing, ng isang AI-generated video na naglalarawan sa mga Pilipino bilang “stupid monkey”.
Binigyang-diin ni Tarriela na noong Enero 2026, mabilis na naghain ng diplomatic protest ang China at pinag-sorry siya ng ilang senador dahil sa pagpapakita niya ng karikatura ni Chinese President Xi Jinping.
Ani Tarriela, ilang mga senador noon ang nagsasabing dapat siyang humingi ng tawad sa China, kayat tanong niya, sasabihin din ba umano nila ito ngayon na dapat humingi ng tawad ang China dahil ang videong ito ay nagpapababa sa atin bilang mga Pilipino?
Umaasa siya na magkakaisa ang mga mambabatas na kondenahin ang China dahil ang ininsulto sa video ay ang mismong national identity ng bawat Pilipino.
**
Mariing tinutulan ni dating Surigao del Norte Representative Robert Ace Barbers ang panawagan na ibalik ang “Duterte-style of governance” o ang ‘kamay na bakal’ na istilo ng pamumuno laban sa kriminalidad.
Ito ay kasunod ng karumal-dumal na pananaksak at pagpatay sa isang motorcycle taxi rider sa Caloocan City, na umani ng samu’t saring reaksiyon kung saan may ilang nagsasabing “nakaka-miss” ang istilo ng dating pangulo dahil sa isyu.
Subalit giit ni Barbers, “repeat offender” at may kriminal na tendensya ang suspek.
Tanong niya sa publiko, “Namimiss ba natin ‘yung bawat kanto may patay? ‘Yan ba ang ehemplo ng isang tinatawag na kamay na bakal?”
Binigyang-diin niya na ang mga kriminal ay dapat panagutin sa ilalim ng umiiral na batas at dumaan sa tamang proseso, hindi sa pamamagitan ng pamamaslang sa mga lansangan.
**
Sinampahan ng patong-patong na kaso sa Office of the Ombudsman sina Uswag Ilonggo Representative Jojo Ang Jr., dating Ako Bicol Representative Zaldy Co, negosyanteng si Alfonso Tan, at mga opisyal ng Sunwest Inc., International Builders Corp., J.E. Tico Construction Company, Allencon Development Corp., at A.M. Oreta & Company.
Ang limang magkakahiwalay na reklamo ay inihain ng Amlig Antique Alliance, isang koalisyon ng mga environmental advocate, kaugnay ng umano’y katiwalian at mga proyektong sinasabing nagdulot ng pinsala sa kalikasan sa Antique.
Kasama rin sa mga inireklamo ang mga dating at kasalukuyang opisyal ng Department of Public Works and Highways (DPWH) Region VI, DPWH Antique District Engineering Office, at Department of Environment and Natural Resources–Environmental Management Bureau Region VI.
Ayon sa Amlig Antique Alliance, ang mga proyektong ipinatupad mula 2019 hanggang 2025 ay lumabag umano sa environmental laws at procurement rules.