Idineklara na ang “severe to extreme” heatwaves sa bawat estado at teritoryo ng Australia maliban sa Queensland.
Kasalukuyan kasing dumaranas ng catastrophic fire conditions ang ilang lugar sa Australia at inaasahan pang tatamaan ng heatwaves ang karamihan sa mga lugar sa naturang bansa.
Tinatayang makakaranas din ng mataas na temperatura sa bansa sa mga susunod na araw.
Sa Biyernes, magdedeklara ang estado ng Victoria ng “total fire ban”, kasabay ng pagtataas sa fire danger rating sa “catastrophic”, ang pinakamataas na lebel. Isasarado rin ang nasa 450 paaralan at childcare centers.
Ngayong Huwebes, naging pahirapan sa mga bumbero ang pag-apula sa ilang sumiklab na sunog sa Victoria at New South Wales kung saan dose-dosenag eroplanong naglalaman ng tubig ang pinakalat para apulahin ang malalaking sunog malapit sa city ng Wodonga.
Ang Melbourne naman ay nakaranas ng pinakamainit na araw kahapon sa nakalipas na anim na taon na pumalo sa 40.9 degrees Celsius.
Ayon sa isang opisyal mula sa Bureau of Meteorology, sa araw ng Biyernes ang “real peak ng heatwave.” Bunsod nito, magiging napaka-init na araw ang mararanasan sa halos lahat ng lugar sa South Australia, Victoria, karamihan ng lugar sa New South Wales at ilang parte ng Tasmania.
----
Naitala ang mararahas na labanan sa pagitan ng kampo ng nagpo-protesta at security forces sa gitna ng paglawak pa ng kilos-protesta sa Iran.
Ito na ang ika-11 araw ng mga serye ng kilos-protesta sa naturang bansa.
Batay sa ulat ng isang news agency sa Iran na malapit sa Revolutionary Guards, napatay ang dalawang pulis matapos barilin ng mga armadong indibidwal sa may south-western town ng Lordegan.
Sa mga ibinahaging video rin online, makikita ang tensiyonadong labanan sa pagitan ng mga protester at security forces kung saan maririnig ang mga tunog ng putok ng baril.
Sa isang footage naman mula sa iba pang mga lugar sa Iran, may ipinakalat na security forces na nagpaputok ng baril at naghagis ng tear gas laban sa mga nagpoprotesta, kung saan ilan sa kanila ay binabato ang mga pwersa ng gobyerno.
Lumawak pa ang mga demonstrasyon sa 111 cities at towns sa lahat ng 31 probinsiya ng Iran, base sa ulat mula sa isang news agency na nakabase sa US.
Sa kabuuan, napaulat na nasa 34 na protester at apat na security personnel ang napatay sa kasagsagan ng kaguluhan at may 2,200 protesters ang inaresto.
Matatandaan, sumiklab ang mga protesta sa Iran noong Disyembre 28, nang magprotesta ang shopkeepers sa mga kalsada ng kabisera ng Tehran para ipahayag ang kanilang galit sa pagbagsak ng halaga ng Iranian currency na rial laban sa dolyar ng Amerika.
Kalaunan, sumama ang University students sa mga protesta at nagsimulang kumalat sa iba pang mga siyudad ng Iran.
-----