Isinusulong sa Senado ang panukalang batas na magbabawas ng hanggang 50 porsiyento sa remittance fees ng mga overseas Filipino workers (OFWs), sa gitna ng patuloy na reklamo hinggil sa mataas na singil at nakatagong bayarin sa pagpapadala ng pera pauwi ng Pilipinas.
Naghain si Senator Jinggoy Ejercito Estrada ng Senate Bill No. 1074 na naglalayong direktang bawasan ang gastos ng mga OFW sa pagpapadala ng kanilang kita sa pamilya. Ayon sa panukala, oobligahin ang mga bangko at remittance centers na magpatupad ng kalahating diskwento sa remittance fees, kapalit ng pahintulot na mag-claim ng tax deductions para sa kanilang operational costs.
Layunin ng panukala na masiguro na mas malaking bahagi ng kinikita ng mga OFW ang napupunta sa kanilang pamilya, imbes na nauubos sa bayarin. Batay sa datos na binanggit, umabot sa record-high na 38.34 bilyong dolyar ang remittances ng OFWs noong 2024—tatlong porsiyento na mas mataas kumpara noong 2023—na katumbas ng 8.3% ng gross domestic product at 7.4% ng gross national income ng bansa.
***
Bumaba sa 2.25 million ang bilang ng mga Pilipinong walang trabaho o negosyo noong Nobiyembre ng nakalipas na taon mula sa 2.54 milyong naitala noong Oktubre 2025.
Base sa pinakabagong labor force survey ng Philippine Statistics Authority (PSA), iniulat ni Undersecretary at National Statistician Claire Dennis Mapa na naitala ang 4.4% na unemployment rate noong Nobiyembre 2025, ibig sabihin, nasa 44 mula sa 1000 indibidwal na nasa labor force ang walang trabaho o negosyo sa nabanggit na panahon.
Mas mataas ito kung ikukumpara sa naitalang unemployment rate noong Nobiyembre 2024 na nasa 3.2% subalit mas mababa kung ikukumpara sa naitalang 12% unemployment rate noong Oktubre 2025.
Tinukoy ng PSA Chief ang ilang mga sektor na nakitaan ng pagtaas ng unemployment gaya ng accommodation and food service gayundin sa wholesale at retail trade sectors.
**
Maaaring ilipat ang government contractor na si Sarah Discaya sa National Bureau of Investigation (NBI) detention facility sa New Bilibid Prison, partikular sa Building 14 ng Maximum Security Compound sa Muntinlupa City.
Ito ay kung maaprubahan ang request ng kanyang kampo para sa transfer, ayon kay NBI Director Angelito Magno. .
Ang naturang pasilidad ay may 29 selda, tig-8 square meters bawat isa, at naa-access lamang sa NBP main road malapit sa Bureau of Corrections Museum.
Sa ngayon, nakakulong si Discaya, kasama ang walong kapwa niya akusado sa Lapu-Lapu City Jail sa Cebu sa kasong graft at malversation of public funds.