Nagpasya ang Supreme Court (SC) En Banc na tuluyang ibasura ang mosyon ng Kamara na humihiling na baligtarin ang desisyon noong Hulyo 25, 2025 na nagsasabing labag sa Konstitusyon ang impeachment laban kay Vice President Sara Z. Duterte.
Pinagtibay ng SC na ang ika-apat na reklamong impeachment na ipinadala sa Senado noong Pebrero 5, 2025 ay bawal na sa ilalim ng Article XI, Section 3(5) ng Konstitusyon.
Hindi nakibahagi si Associate Justice Alfredo Benjamin Caguioa, habang naka-leave si Associate Justice Maria Filomena Singh. Nilinaw ng SC na ang unang tatlong reklamo ay hindi naisama sa Order of Business sa loob ng itinakdang sampung session days.
Binigyang-diin din ng SC ang pagkakaiba ng dalawang paraan ng impeachment: ang una ay dumaraan sa proseso ng Committee on Justice, samantalang ang ikalawa ay agad na naisasakatuparan kung may pirma ng isang-katlo ng mga miyembro ng Kamara.
Pinagtibay ng SC na nananatiling umiiral ang due process sa impeachment, ngunit ito ay may natatanging katangian at ang ganap na paglilitis ay sa Senado nagaganap.
Agad na ipinatutupad ang resolusyon matapos ang digital service sa lahat ng partido.
----
Nirerepaso na ng Senate Committee on Ethics ang sarili nitong rules para masimulan ang pagdinig laban sa mga inirereklamong senador sa lalong madaling panahon.
Maalalang unang sinabi ni committee chairman, Sen. JV Ejercito na hindi masimulan ang pagdinig dahil hindi pa nakukumpleto ang mga miyembrong bumubuo ng naturang komite, ngunit sa pagbabalik-sesyon ng Senado nitong Enero-26 ay tuluyan nang napunan ang mga bakanteng posisyon.
Ayon kay Ejercito, inaaral na nila ang rules na dati nang ginagamit ng 19th Congress at target na maipresenta ito sa susunod na lingo para sa organizational meeting ng naturang komite.
Dito ay pagdedesisyunan ng buong komite ang mga gagamiting panuntunan, at aaralin ang mga nakabinbing reklamo.
Susuriin aniya ng komite kung saan sa mga reklamo ang may sapat na grounds, para tuluyang pagdesyunan ng mga mambabatas, kabilang dito ang kontrobersyal na reklamong inihain laban kay dating Senate President Chiz Escudero.
Kabilang sa mga miyembro ng majority na magiging bahagi ng komite ay sina Sen. Kiko Pangilinan, Sen. Risa Hontiveros, at Sen. Erwin Tulfo, habang pangungunahan naman ni Sen. Rodante Marcoleta ang mga kinatawan ng majority bloc.
Maalalang maging si Ejercity na chairman mismo ng komite, ay sinampahan din ng ethics complaint dahil sa hindi agad pag-aksyon sa reklamong inihain kay Sen. Escudero.
Sagot naman ni Ejercito, hindi niya ma-aksyunan ang naturang reklamo dahil hindi pa nabubuo ang kaniyang komite, dahil sa sunod-sunod na budget hearing nitong huling bahagi ng 2025.
----
Ipinauubaya na ng Department of Foreign Affairs (DFA) sa law enforcement authorities ang pagtugon sa impormasyon kung nasa Sweden si dating Congressman Zaldy Co.
Sa isang panayam, sinabi ni DFA Secretary Ma. Theresa Lazaro na ang naturang usapin ay isang law enforcement matter kayat mas mainam na tanungin ang mga awtoridad hinggil dito.
Ipinaliwanag din ng kalihim na hindi na niya kailangan pang makipag-usap sa Sweden dahil maliwanag na sa dokumento ang nilalaman nito.
Ang tinutukoy na dokumento ng DFA Chief ay ang certiorari petition na inihain ni Co laban kay Ombudsman Jesus Crispin Remulla.
Nakalakip dito ang isang notaryo, kung saan nabanggit na personal na humarap si Co noong Enero 15 sa notary public na si Beatrice Gustafsson sa Stockholm, Sweden.
Taliwas naman ito sa inisyal na impormasyon na posibleng nasa Portugal si Co dahil mayroon umano itong Portuguese passport na posibleng matagal na niyang nakuha.