Binigyang-diin ni Comelec Chairman George Erwin Garcia sa pagtalakay ng Kamara ukol sa Anti-Political Dynasty Bill, na dapat malinaw, tiyak, at madaling ipatupad ang batas na babalangkasin.
Hangad din ni Garcia na maaga itong mabuo para makahabol sa mga paparating na eleksyon.
Ayon sa kanya sa panayam ng Bombo Radyo, hindi dapat bigyan ng sobrang kalayaan ang Comelec sa interpretasyon upang maiwasan ang kalituhan at hindi pantay na pagpapatupad.
Giit ni Garcia, kung hindi agad maipapasa ang panukala, maaapektuhan ang paghahanda para sa 2028 elections.
Ipinaliwanag ng opisyal na may natitira na lamang isang taon at anim na buwan bago ang filing ng Certificates of Candidacy kaya’t kritikal ang oras para sa voter education at implementasyon.
Binanggit din niya ang posibleng conflicts sa penalties gaya ng disqualification at cancellation of candidacy.
Dagdag pa, maaaring magkaroon ng loopholes kung hindi maayos ang pagkakabuo ng batas.
Sa kabuuan, nanawagan si Garcia na gawing malinaw at tiyak ang Anti-Political Dynasty Law upang matiyak ang patas na halalan at maiwasan ang problema sa darating na eleksyon.
----
Nanindigan ang Bureau of Immigration (BI) na walang record ng anumang pagbiyahe sa labas ng bansa ang puganteng business tycoon na si Atong Ang.
Ito ay sa gitna ng mga ulat na posibleng tumakas si Ang patungong Cambodia kasunod ng inisyung arrest warrants laban sa kaniya kaugnay sa kaso ng mga nawawalang sabungero.
Ayon kay BI Spokesperson Dana Sandoval, base sa record ng Immigration, lumalabas na walang kamakailang departure o pagbiyahe sa labas ng bansa si Ang.
Minamanmanan naman aniya ng Philippine Coast Guard at local force enforcement ang mga illegal migration corridors at kung sakaling may mamataang illegal crosser agad na ipinagbibigay-alam sa Bureau of Immigration para masuri ang kanilang records.
Subalit, hanggang sa ngayon wala pa aniyang koordinasyon sa kanila, na nangangahulugang wala pang na-intercept o naharang.
Nauna nang sinabi ni DILG Sec. Jonvic Remulla na kumpiyansa ang mga awtoridad na nananatili sa Pilipinas si Ang bagamat hindi nila isinasantabi ang posibilidad na nasa Cambodia ito dahil mayroon umanong sinet-up na online sabong si Ang doon.
Samantala, inihayag ng kalihim na posibleng hingin ni Pangulong Ferdinand Marcos Jr. ang tulong ng gobyerno ng Cambodia para arestuhin si Ang sakaling makumpirma ang naturang impormasyon.