Kinansela ang tanyag na Japanese cherry blossom festival na ginaganap taon-taon malapit sa Mount Fuji dahil umano sa mga lumalalang reklamo hinggil sa “disruptive tourist behaviour” o kawalan ng disiplina ng mga dayuhan at lokal na bisita na labis nang nakakaapekto sa komunidad.
Ayon sa mga opisyal sa lungsod ng Fujiyoshida sa Japan, hindi na nila itutuloy ang paghost sa Arakurayama Sengen Park cherry blossom festival ngayong taon dahil naging talamak ang mga insidente ng panggugulo sa lungsod. Kabilang sa mga napaulat ang tahasang pagpasok sa mga pribadong tahanan nang walang pahintulot para lamang gumamit ng palikuran o trespassing, pagkakalat ng mga basura, at ang nakakabahala na pagdumi ng ilang turista sa mga pribadong bakuran. Bukod dito, marami ring turista ang napaulat na nakikipagtalo at nakikipag-away pa sa mga residente kapag sinisita sa kanilang maling gawain.
Ang taunang festival ay dinarayo ng hanggang 200,000 bisita kada taon dahil sa magagandang tanawin ng bulaklak ng Sakura, stage events, at food stalls na nagtatampok ng lokal na lutong Hapon.
Ngunit nito lamang Pebrero 3, inanunsyo ang pagkansela ng naturang festival upang mapangalagaan ang katahimikan at kaayusan ng kanilang mga residente.
Sa kabila ng pagkansela ng festival, inaasahan pa rin ng lungsod ang pagdagsa ng mga bisita sa panahon ng “blooming season” ng mga cherry blossom. Hihikayatin naman ang mga turista na gumamit ng pampublikong sasakyan, iwasan ang pagkuha ng mga litrato nang walang pahintulot lalo na sa mga pribadong lugar, at igalang ang residential areas sa pamamagitan ng hindi pagpasok sa mga pribadong ari-arian.
----
Aabot sa 12 katao ang nasawi habang dose-dosenang iba pa ang nasugatan matapos sumabog ang isang suicide bomber sa isang Shia mosque sa Islamabad nitong Biyernes, sa gitna ng isinasagawang panalangin ng mga deboto.
Ayon sa ulat, sumabog ang attacker sa gate ng mosque, dahilan para magpadala ng emergency response sa buong kabisera.
Agad na rumesponde ang pulisya at rescue teams, at isinara ang mga kalapit na lugar.
Naitala naman ang high alert sa mga ospital.
Sa ngayon ‘wala pang grupo ang nagpahayag na responsable sa insidente.
Kinumpirma naman ng Pakistan Institute of Medical Sciences na ipinatupad agad nila ang emergency protocols, kasama ang iba pang mga departamento nito tulad ng trauma, orthopedics, burn care, at neurology na nasa full alert na.
Isinara rin ng seguridad ang mga karatig na lugar at pinaigting ang surveillance upang bantayan ang posibleng kahina-hinalang pag-kilos ng grupo.
Maalala na noong Nobyembre 11, 2025, isang suiside blast ang naganap sa isang district at sessions court sa G-11 sector ng Islamabad, na ikinasawi rin ng 12 katao at ikinasugat ng higit 30.
Noong panahong iyon, inakusahan ng Pakistan ang India sa pag-atake, isang alegasyon na mariing itinanggi ng New Delhi.
Ayon kay Randhir Jaiswal, tagapagsalita ng Indian foreign ministry, ginagamit ng Pakistan ang mga ganitong kuwento upang ilihis ang pansin mula sa sariling political instability at internal power struggles.