Pinaghihinalaan ng pamahalaan ang dalawang mambabatas mula sa Northern Luzon bilang umano’y mga utak sa likod ng isang bilyong-pisong ilegal na operasyon ng sigarilyo, ayon kay Interior Secretary Juanito Victor “Jonvic” Remulla nitong Huwebes, Feb. 5, 2026.
Lumabas ang pahayag matapos ang ginawang operasyon ng mga operatiba sa isang ilegal na pabrika ng sigarilyo sa Barangay Panipuan, kung saan anim na Chinese national ang inaresto at 60 Pilipino ang nasagip.
Ayon kay Remulla, ang manufacturing plant ay nag-operate nang walang kaukulang lisensya at permit sa buong buwan ng Enero 2026 at nakagawa umano ng humigit-kumulang P4.5 billion na halaga ng sigarilyo.
Sinabi ng kalihim na may impormasyon ang Department of the Interior and Local Government (DILG) na nagsimula ang operasyon noong Enero 1, habang naitayo na ang mga makina noong Disyembre bago pa dumating ang mga Chinese national.
Ayon sa DILG chief, ang mga Pilipinong manggagawa ay biktima ng human trafficking.
Sinabi ng DILG na pinilit umano silang magtrabaho nang walang sahod at sa hindi makataong kondisyon.
Binigyang-diin din ni Remulla na ang human trafficking at mga paglabag sa Anti-Agricultural Sabotage Act ay mga non-bailable offense.
Kinilala ng DILG ang mga incorporator ng warehouse bilang tatlong Pilipino at dalawang Korean national.
Ayon kay PNP Criminal Investigation and Detection Group (CIDG) Director Robert Morico II, naipadala na ang subpoena sa isa sa mga Pilipinong incorporator.
Sa hiwalay na pahayag, sinabi ng Philippine National Police (PNP) na may pagkakahawig ang mga pekeng sigarilyong nasamsam sa Pampanga sa mga produktong natagpuan sa mga naunang operasyon sa Balete, Batangas noong Disyembre 31, 2025 at sa Malabon noong Enero 1, 2026.
Ayon kay Remulla, tinatayang mahigit P30 billion ang nawawala sa pamahalaan kada taon dahil sa ilegal na kalakalan ng sigarilyo.
Patuloy ang imbestigasyon ng mga awtoridad upang tukuyin ang buong lawak ng operasyon at ang pananagutan ng mga sangkot, kabilang ang mga pinaghihinalaang opisyal ng pamahalaan.
----
Nakahanda na ang 3.5 million family food packs para sa mga residenteng maaapektuhan ng bagyong Basyang, ayon sa Department of Social Welfare and Development (DSWD).
Paliwanag ng ahensiya, may sapat itong bulto ng family food packs na naka-preposisyon sa iba’t ibang rehiyon na inaasahang dadaanan at maaapektuhan ng bagyo.
Bilang paghahanda sa epekto ng bagong bagyo, inatasan na ng DSWD ang mga regional office nito na maging alerto at bantayan ang sitwasyon, lalo sa mga lugar na magsasagawa ng preemptive evacuation.
Sa kasalukuyan, mayroong mahigit 186,000 FFP sa CARAGA, higit 77,000 FFP sa Central Visayas, at mahigit 161,000 sa Eastern Visayas, tatlo sa mga rehiyong inaasahang pangunahing maaapektuhan ng bagyo.
Nakahanda rin ang mahigit 672,000 FFPs sa Luzon Disaster Resource Operations Center habang sa Visayas Disaster Resource Operations Center ay nakaimbak ang mahigit 317,000 .
Nasa ilalim na ng Blue Alert status ang DSWD kasabay ng inaaasahang pagdaan ng bagyong Basyang sa Visayas at Mindanao.
Samantala, nakahanda rin ang mahigit P3.04 billion Quick Response Fund ng ahensiya na maaaring gamitin para sa relief at early recovery operations.
---
Nanindigan si dating Sen. Francis Tolentino na may malinaw na coordinates sa West Philippine Sea (WPS), salig sa itinatakda ng Republic Act No. 12064, o Philippine Maritime Zones Act.
Ito ay taliwas sa claims ni Sen. Rodante Marcoleta na hanggang sa ngayon ay wala pang ‘specific computation o coordinates’ ng West Philippine Sea.
Paliwanag ni Tolentino, ang coordinates na nakapaloob sa Philippine Maritime Zones Act, ay nai-deposito, tinanggap, at kinikilala na ng Secretary-General ng United Nations, at ang mga ito na ang magsisilbing official maritime reference ng Pilipinas.
Kung mayroon man aniyang magsasabi na walang malinaw na mapa at coordinates sa WPS, ito ay isang panlilinlang at isang uri ng disinformation.
Si Tolentino ang naging principal sponsor ng Republic Act No. 12064, ang batas na tumutukoy sa territorial sea, contiguous zone, exclusive economic zone (EEZ), and continental shelf ng Pilipinas.
Naging sentro ng mainit na debate nina Sen. Rodante Marcoleta at Sen. Kiko Pangilinan ang naturang isyu sa kasagsagan ng pagtalakay sa panukalang Senate Resolution No. 256, ang resolusyong kokundena sa mga kontrobersyal na pahayag ng Chinese Embassy in Manila kaugnay sa isyu sa pinagtatalunang karagatan.
Nanindigan si Sen. Pangilinan na may malinaw na hangganan o coordinates ang WPS, tulad ng nakasaad sa ilang batas tulad ng Philippine Maritime Zones Act, Administrative Order No. 29 (2012) na nagpapangalan sa pinagtatalunang karagatan bilang WPS, at ang 2016 Arbitral Tribunal na nagbabasura sa nine-dash-line claim ng China.