Ipinag-utos na ni Tourism Secretary Christina Frasco sa regional offices na tanggalin ang tourism-related materials na mayroong imahe niya.
Bukod dito, iniutos din ng kalihim na huwag mag-produce ng anumang material na mayroong imahe niya.
Umapela rin ang kalihim sa mga lokal na pamahalaan na huwag maglagay ng mga tarpaulin na mayroong nakalagay na larawan niya sabay-giit ng kalihim na hindi siya tatakbo.
Nilinaw naman ng kalihim na ang mga materyales na mayroong nakalagay na mga larawan niya ay bilang welcome items na ipinamahagi nang bumisita siya sa ilang local officials.
Binigyang linaw din ng kalihim na walang direktiba mula sa kaniya o sa DOT na naguutos ng paglalagay sa kaniyang mga larawan sa mga tourist destination.
Ginawa ni Frasco ang pahayag isang araw matapos na punahin ni Senator Raffy Tulfo ang kalihim dahil sa umano’y pagpromote ng kaniyang sarili kesa sa local tourist destinations, bagay na itinanggi na ng kalihim sa pamamagitan ng paggiit na wala siyang planong tumakbo sa susunod na halalan.
----
Tumaas sa bagong rekord na P17.707 trilyon ang kabuuang utang ng pambansang pamahalaan sa pagtatapos ng taong 2025, bunsod ng paghina ng halaga ng piso at karagdagang panghihiram para sa mga proyekto at programa.
Ayon sa pinakahuling datos ng Bureau of the Treasury (BTr), lumobo ng 10.32 porsyento ang utang ng gobyerno mula P16.051 trilyon noong 2024 patungong P17.707 trilyon noong 2025.
Malaking bahagi ng utang ay mula sa loob ng bansa o domestic debt, na bumubuo sa 68.4 porsyento ng kabuuang utang, habang ang natitirang 31.6 porsyento ay mula sa labas ng bansa o foreign financiers, na apektado ng pagbabago sa exchange rates at interest rates.
Nasa P12.116 trilyon ang domestic debt, samantalang nasa P5.591 trilyon naman ang external debt.
Samantala, nagpahayag ng pagkabahala ang isang ekonomista mula sa Ateneo de Manila University na nagsabing “nakakaalarma” ang sitwasyon, dahil aniya limitado na ang mga opsyon ng pamahalaan, lalo na’t nahaharap ang bansa sa mga isyu ng korapsyon.
----
Inanunsyo ng Department of Social Welfare and Development (DSWD) ang pagtaas ng alokasyon ng pondo para sa Supplementary Feeding Program (SFP), na naglalayong mapabuti ang kalusugan at nutrisyon ng mga batang naka-enroll sa Child Development Centers (CDC) at Supervised Neighborhood Play (SNP). Sa pamamagitan ng feeding sessions, naghahain ng gatas at masusustansiyang mainit na pagkain sa mga bata.
Itinaas sa P9.26 bilyon ang badyet para sa Supplementary Feeding Program sa taong 2026, mula sa P5 bilyon na alokasyon noong 2025.
Pinalawig din ang tagal ng programa, kung saan ang daily feeding sessions ay mula sa dating 120 araw, ngayon ay 180 araw na.
Dagdag pa rito, sa mga lalawigang may mataas na insidente ng kahirapan, tumaas ang bilang ng mga sakop na Child Development Centers mula 5,284 noong 2025 tungo sa 7,824 ngayong 2026, upang mas maraming komunidad sa malalayong lugar ang maabot ng serbisyo.
Patuloy namang nakikipag-ugnayan at nakikipagtulungan ang DSWD sa pangunguna ni Sec. Rex Gatchalian sa mga lokal na pamahalaan upang matiyak ang maayos na pagpapatupad ng Supplementary Feeding Program sa buong bansa.