Feb 25, 2026 | 8:41 AM
Sisimulan ng House Committee on Justice sa Marso 2 hanggang 4 ang pagdinig sa apat na impeachment complaint laban kay Vice President Sara Duterte.
Ito ang kinumpirma ni House Committee on Justice at Batangas Rep. Gerville “Jinky Bitrics” Luistro.
Sinabi ni Luistro na unang tutukuyin ng komite kung sapat sa porma at sapat sa nilalaman ang mga reklamo.
Kapag natapos ang deliberasyon sa porma sa unang araw, agad itong lilipat sa pagsusuri ng nilalaman sa susunod na araw.
Kung hindi matapos, magpapatuloy ang pagdinig sa kasunod na araw.
Maaari ring ituloy ang mga pagdinig kahit naka-recess ang Kamara, kung kinakailangan.
**
Inaprubahan ng House Committee on Basic Education and Culture noong Lunes ang tatlong pangunahing education reform bills na inakda nina Leyte Rep. Martin Romualdez, Tingog Partylist Representatives, Yedda Marie Romualdez, Andrew Julian Romualdez at Jude Acidre na naglalayong tugunan ang lumalalang krisis sa edukasyon sa bansa.
Kabilang sa mga aprubadong panukala ay ang mga sumusunod: Classroom-Building Acceleration Program (CAP) Act (HB 5577) na siyang nagbibigay daan sa LGUs at pribadong sektor na makipagtulungan sa DepEd sa pagtatayo ng mga silid-aralan para mabawasan ang backlog na higit 165,000 classrooms; Education Pathways Act (HB 4248) siyang nagre-restructure ng post-Junior High School education sa dalawang track: University Preparatory (DepEd) at Technical-Vocational (TESDA), upang mas ma-align ang edukasyon sa employment at learning outcomes at ang Emergency Classroom Building Act (HB 5103) na nagbibigay ng pansamantalang kapangyarihan sa Pangulo para pabilisin ang konstruksyon, rehabilitasyon, at repair ng mga silid-aralan, na itinuturing na national emergency ang kakulangan sa education infrastructure.
Ayon kay Acidre, Chairperson ng House Committee on Higher and Technical Education, ang pag-apruba ng komite ay hakbang patungo sa implementasyon ng mga reporma, hindi lamang pag-diagnose sa problema.