Kusang-loob na humarap si House Majority Leader Sandro Marcos sa pagdinig ng Independent Commission for Infrastructure (ICI) kaugnay ng umano’y iregularidad sa mga flood control project.
Ayon kay Marcos, hindi siya pinadalhan ng subpoena at dumalo siya upang makatulong sa imbestigasyon ng komisyon.
Ipinahayag niyang handa siyang sagutin ang lahat ng tanong at magbigay ng anumang impormasyon na makatutulong sa paglinaw ng isyu.
Humiling ang kanyang kampo ng executive session, na agad namang pinagbigyan ni ICI Chairman Andres Reyes Jr.
Nauugnay ang pagharap ni Marcos sa alegasyon ni dating Ako Bicol Rep. Zaldy Co na may bilyong pisong budget insertions umano sa flood control projects mula 2023 hanggang 2025.
Mariin namang itinanggi ni Marcos ang paratang at iginiit na wala siyang kinalaman sa anumang anomalya.
***
Nakumpleto na ni dating Bamban, Tarlac mayor Alice Guo ang lahat ng medical at laboratory test bilang paghahanda sa kanyang paglipat sa Correctional Institution for Women (CIW) sa Mandaluyong City.
Kumpirmado ng Bureau of Jail Management and Penology (BJMP) nitong Huwebes na naisagawa na sa loob ng Pasig City Jail ang lahat ng kinakailangang pagsusuri.
Inisyu ng Pasig Regional Trial Court ang commitment order na nag-uutos na ilipat si Guo sa CIW sa Mandaluyong City upang doon niya simulan ang pagsisilbi ng kanyang sentensiya.
Ayon sa BJMP, bahagi ng standard pre-transfer protocol ang mga pagsusuring ito bago ma-turn over ang isang inmate sa Bureau of Corrections (BuCor).
Nauna nang ibinasura ng Pasig RTC Branch 167 ang hiling ni Guo na manatili sa Pasig City Jail, dahil ang CIW ang itinalagang pasilidad para sa high-risk female inmates.
***
Maaring maglandfall ang bagyong Wilma sa mga islang nakapaloob sa Eastern Visayas at Caraga Region, batay sa inisyal na pagtaya ng state weather bureau.
Ayon kay Weather Services chief Engr. Chris Perez, maaaring mangyari ang landfall bukas ng gabi (Dec. 5) o sa Sabado ng umaga.
Maaaring tumama ang naturang bagyo sa Guian, Eastern Samar, o Dinagat Islands, o Bucas Grande.
Sa pagtama nito sa kalupaan ng bansa, inaasahang magdadala ang naturang bagyo ng mga serye ng pag-ulan sa Visayas at Mindanao.
Nasasaklawan ng bagyong Wilma ang 200km sa palibot nito. Maaapektuhan dito ang ilang mga probinsiya sa Southern Luzon, buong Visayas, at Mindanao, lalo na ang mga probinsya sa hilagang bahagi ng naturang rehiyon.
Inaasahang magtatagal ang mga pag-ulan hanggang sa araw ng Lingo (Dec. 7).