Umabot na sa mahigit 1,160 ang kabuuang bilang ng mga nasawi sa malawakang pagbaha at landslide sa ilang bahagi ng Asya, kabilang ang Sri Lanka at Indonesia.
Ang matinding ulan ay dulot ng magkaka-hiwalay na weather systems na tumama sa bansa ng Sri Lanka, Sumatra, Indonesia, katimugang bahagi ng Thailand, at hilagang Malaysia, kasabay ng monsoon season.
Sa Indonesia, tinatayang 593 na ang nasawi at 470 ang kasalukuyang nawawala.
Nagpadala na rin ang gobyerno ng tatlong warships at dalawang hospital ships, ngunit maraming kalsada parin sa mga apektadong lugar ang hindi pa madaanan.
Samantala, sa Sri Lanka naman naitala na ang 390 na nasawi at 352 ang nawawala. Kasabay niyan ang pagdedeklara ni Sri Lankan President Anura Kumara Dissanayake ng state of emergency.
Habang sa Thailand, 176 narin ang naitalang nasawi dahil sa sama ng panahon, habang sa Malaysia, dalawang tao na ang naiulat na nasawi bunsod ng sama ng panahon.
Ayon sa World Health Organization ang mga nararanasang kalamidad ay dulot ng mga paalala kung paano pinapalala ng climate change ang mga matitinding weather events, habang patuloy ang mga operasyon para sa rescue, relief, at rehabilitasyon sa mga nasalantang residente sa Asya.
------
Muling nahatulan ng korte sa Dhaka, Bangladesh ang dating Prime Minister na si Sheikh Hasina.
Siya ay pinatawan ng panibagong 21 taong pagkakakulong dahil sa mga kasong korupsiyon at pagkamkam ng lupa sa isang proyektong pabahay ng pamahalaan.
Bukod sa pagkakakulong, pinagmulta rin siya ng tig-100,000 taka sa bawat kaso.
Kasama sa hatol ang kanyang anak na si Sajeeb Wazed Joy at anak na babae na si Saima Wazed Putul na kapwa nahatulan ng tig-5 taong pagkakakulong at multa.
Ang mga lupang sangkot ay bahagi ng Rajuk New Town Project sa Purbachal, isang suburb ng Dhaka.
Isang linggo bago nito, si Hasina ay hinatulan ng kamatayan dahil sa crimes against humanity matapos ang marahas na crackdown laban sa mga estudyanteng nag-aklas noong 2024.
Ang hatol na ito ay nakikitang dagdag na dagok sa dating lider na matagal nang nakikipaglaban sa mga kasong kriminal at politikal laban sa kanya.
-----
Handang isapubliko ni US President Donald Trump ang resulta ng kaniyang magnetic resonance imaging (MRI).
Subalit inamin nito na hindi niya alam kung anong bahagi ng kaniyang katawan ang isinailalim sa scan.
Naniniwala ito na hindi ang kaniyang utak ang isinailalim sa scan.
Ang nasbing komento ay kasunod ng hamon ni Minnesota Governor Tim Walz na dapat maglabas ng resulta ang MRI results ang US President matapos na batikusin siya sa paghawak nito sa Somali community.
Magugunitang noong Oktubre ay ibinunyag ni Trump na sumailalim ito sa MRI sa Walter Reed National Military Medical Center kung saan ayon naman sa White House ay isang taunang checkup lamang.