Ipinag-utos ng top US Navy commander ang ikalawang round ng military strikes sa umano’y Venezuelan drug boat.
Kinumpirma ito ni White House Press Secretary Karoline Leavitt.
Dinepensahan ng White House official ang naging hakbang ni US Navy admiral Frank Bradley na alinsunod ito sa kaniyang awtoridad at sa batas.
Kinumpirma din ni Leavitt na inotorisa ni US Secretary of War Pete Hegseth ang naturang military strikes subalit hindi nagbigay ng direktiba na patayin ang lahat gaya ng napaulat.
Ang ikalawang strikes ay napaulat na inilunsad matapos na makaligtas sa inisyal na pagsabog ang dalawang katao at kumakapit sa nasusunog na barko.
Kapwa naman nagpahayag ng pagkabahala ang mga Republican at Democratic lawmakers kaugnay sa mga ulat at nangako ng imbestigasyon sa naturang pag-atake.
Iginiit naman ni White House Press Secretary Leavitt na nilinaw nina US President Donald Trump at Sec. Hegseth na ang mga iniuri bilang narco-terrorist groups ay subject ng nakamamatay na pag-atake alinsunod sa mga batas ng digmaan.
May karapatan din aniya ang US President na alisin ang mga ito kung sila’y nagdudulot ng banta sa Amerika.
Nitong mga nakalipas na linggo, pinalawig pa ng US ang military presence nito sa Caribbean at nagkasa ng mga serye ng lethal strikes sa mga pinaghihinalaang drug-smuggling boats sa international waters sa may Venezuela at Colombia bilang parte ng tinatawag nitong anti-narcotics operation na kumitil na ng mahigit 80 katao simula noong unang bahagi ng Setyembre ng kasalukuyang taon.
------
Nanindigan ang Ukraine na hindi nila basta ibibigay ang anumang teritoryo na kanilang nasasakupan sa Russia.
Ang nasabing hakbang ay kabilang sa nakasaad sa ceasefire deal na isinusulong ng US.
Sinabi ni Ukraine President Volodymyr Zelensky, na tila pagbabalewala sa international law kapag sila ay tumugon sa kasunduan.
Nanawagan ito na kapag interesado ang Russia sa tunay na tigil putukan ay marapat na tanggapin ang anumang nakasaad sa ceasefire deal gaya ng pagtigil sa pag-atake sa kanila.
-----
Hinimok ni Pope Leo XIV ang mga lider ng Lebanon na yakapin ang tenacity, dialogue, at renewed commitment sa common good sa kanyang talumpati sa Presidential Palace sa Baabda noong Linggo, bilang bahagi ng kanyang apostolic journey sa Turkey at Lebanon.
Binigyang-diin ng pontiff ang kahalagahan ng kapayapaan at pagsisikap sa kabila ng mga krisis na pinagdaanan ng bansa, kabilang ang political paralysis, economic collapse, at epekto ng 2023–2024 war.
Tinukoy niya ang Lebanon bilang “a community of communities, united by a common language: hope,” at pinuri ang tibay at determinasyon ng mamamayan nito.
Pinayuhan ng Santo Papa ang mga lider na manatiling malapit sa kanilang mamamayan, bigyang-diin ang papel ng kabataan at civil society, at iwasang gawing kompetisyon ang pamahalaan. Binigyang-diin niya rin ang kahalagahan ng reconciliation at dialogue upang mapawi ang mga hidwaan, at pinuri ang kontribusyon ng kababaihan sa proseso ng kapayapaan.
Sinabi pa ng Pope na ang kapayapaan ay hindi lamang isang human achievement kundi isang gift at work in progress, at ito ay nagtuturo sa mga tao na “harmonize our steps with those of others.”