Ilang Pilipinong nagtatrabaho malapit sa Cambodia-Thailand border ang inilikas dahil sa lumalalang bakbakan sa pagitan ng dalawang bansa.
Ayon kay Bombo International News Correspondent Toto Cadapan mula sa Thailand, ilang mga Pilipino ang pansamantalang tumuloy sa kanilang mga kaibigan habang ang iba ay nagtungo sa mga shelter na ibinigay ng gobyerno.
Aniya, nasa 200,000 indibidwal na ang inilikas mula sa Cambodia-Thailand border kasama na rito ang ilang mga Pilipino.
Nakikipag-ugnayan aniya ang embahada ng Pilipinas sa Migrant Workers Office sa Thailand para matiyak na ligtas at malayo ang mga Pilipino sa nangyayaring kaguluhan.
Sinabi niya na halos 200 mga guro sa 600 mga paaralan na malapit sa labanan sa pagitan ng dalawang bansa ay pangunahing naapektuhan ng pagpapalitan ng mga airstrike at rockets.
****
Mas malaki ang tiyansa na umusad ang panukalang Anti-Political Dynasty Bill, kasunod ng pahayag ng Malacañang na sinusuportahan nito ang pagpasa ng naturang batas.
Ito ang nakikita ni Senador Bam Aquino — na aminadong bahagi rin ng political family.
Ayon kay Aquino, bago lumabas ang anunsyo ng Palasyo, inakala niyang “mahirap” pa ring maipasa ang panukala kahit nakapaghain na rin sila ng sariling bersyon.
Sa tanong naman kung oras na para sertipikahan bilang urgent ang Anti-Political Dynasty Bill, sinabi ng senador na bagama’t positibong simbolo kung ideklara itong urgent, hindi pa ito kinakailangan sa ngayon.
Umaasa si Aquino na sa unang bahagi ng susunod na taon ay mailalabas na ang committee report ng bill para masimulan na ang deliberasyon.
**
Iniulat ni Pangulong Ferdinand Marcos Jr. na kinansela na ng Department of Foreign Affairs ang passport ni dating Ako Bicol Partylist Rep. Zaldy Co, isa sa mga iniimbestigahan kaugnay flood control project anomaly.
Ayon sa Pangulo, sinabi nitong inatasan na nya ang DFA at PNP na makipag-ugnayan sa mga embahada ng Pilipinas upang matiyak na hindi na magagamit ni Co ang kanseladong pasaporte para umiwas sa mga kaso.
Bahagi rin ng koordinasyon ang agarang pag-report sakaling tangkaing pumasok ni Co sa ibang bansa ng sa gayon agad na maisagawa ang repatriation sa kanya pabalik ng Pilipinas.
Kinumpirma rin ng Pangulo na nananatili sa kustodiya ng NBI si Sara Discaya na iniimbestigahan sa kaparehong kaso, matapos itong sumuko kahapon kahit wala pang lumalabas na warrant of arrest laban sa kanya.
***
Nanawagan ang Concerned Citizens and Taxpayers kay Pangulong Ferdinand Marcos Jr. na agad sibakin si Health Secretary Teodoro Herbosa at pabilisin ang aksyon sa mga reklamong nakabinbin sa Office of the Ombudsman.
Giit ng grupo, dapat tiyakin ng Malacañang na transparent at independent ang imbestigasyon, lalo na’t umano’y posibleng maimpluwensyahan ang proseso dahil ang bagong Ombudsman na si Jesus Crispin Remulla ay kapwa Upsilon fraternity member ni Herbosa.
Isinumite ng grupo ang kanilang reklamo kay Executive Secretary Ralph Recto sa pamamagitan ng 8888 hotline.
Ayon sa kanila, maaaring naaantala ang mga kaso dahil sa umano’y pagbanggit nina Herbosa at ng kanyang executive assistant Allan Tope sa isang Atty. Emman Pichay, na sinasabing konektado sa Office of the First Lady at sangkot sa ilang transaksyon sa DOH.