Australia ang kauna-unahang bansa sa mundo na nagpatupad ng pagbabawal sa paggamit ng social media para sa mga kabataan na wala pang 16 taong gulang.
Ipinahayag ni Prime Minister Anthony Albanese na ang hakbang na ito ay magbibigay ng mas ligtas na simula sa online world para sa mga bata.
Simula ngayong araw, ang mga pangunahing social media platforms ay obligado nang magpatupad ng age verification systems.
Ang mga kumpanya na lalabag sa batas ay maaaring pagmultahin ng hanggang $50 milyon bilang parusa.
Layunin ng bagong regulasyon na protektahan ang mental health ng kabataan laban sa cyberbullying, online exploitation, at adiksyon sa social media.
Maraming magulang ang nagpahayag ng suporta dahil nabawasan ang kanilang pangamba sa kaligtasan ng mga anak online.
Sa mensahe ni Albanese, binigyang-diin niya na ito ay isang makasaysayang hakbang na magtatakda ng pamantayan para sa ibang bansa sa digital age.
-----
Binatikos ni U.S. President Donald Trump ang mga lider ng Europa, na tinawag niyang “mahihina,” at nagbanta na posibleng bawasan ng Estados Unidos ang suporta nito sa Ukraine.
Ginawa niya ang pahayag matapos umanong mabigo ang ilang bansa sa Europa na kontrolin ang migration at wakasan ang matagal nang digmaan sa Ukraine.
Bilang tugon, bumuwelta si UK Foreign Secretary Yvette Cooper at iginiit na nananatiling matatag ang Europa, lalo na sa patuloy na pagtaas ng kanilang suporta para sa military defense ng Kyiv laban sa agresyon ng Russia.
Samantala, patuloy namang pinipilit ni Trump si Ukrainian President Volodymyr Zelensky na pumayag na sa isang kasunduan sa kapayapaan, kabilang ang pagsuko ng ilang teritoryo ng Ukraine, isang kondisyon na hinihingi ng Russia upang itigil ang kanilang pag-atake.
Mariin namang tumutol si Zelensky at sinabing hindi kailanman magbibigay ang Ukraine ng teritoryo nito sa Russia. Ayon sa kanya, handa nilang ilahad sa Estados Unidos ang mga hakbang para sa posibleng pagtatapos ng digmaan, ngunit iginiit niyang hindi nila maaaring talikuran ang kanilang legal at moral na obligasyong protektahan ang bawat bahagi ng kanilang bansa, alinsunod sa umiiral na batas ng Ukraine at ng international law.
-----
Nagdeklara ng nationwide emergency ang gobyerno ng Lithuania dahil sa pagsakop ng weather balloons ng katabing bansa na Belarus.
Kinondina ni Prime Minister Inga Ruginiene ang balloon incursion na tinawag nitong isang uri ng hybrid attack ng Belarus.
Nagdudulot ito ng pangamba sa seguridad at civil aviation.
Itinanggi naman ni Belarusian leader Alexander Lukashenko ang nasabing alegasyon at inakusahan ang Lithuania na pinupulitika sila .