Kumpiyansa si Ombudsman Jesus Crispin Remulla na babalik sa Pilipinas sina Senator Loren Legarda at ang anak nitong si Batangas Rep. Leandro Leviste, matapos silang umalis ng bansa habang nahaharap sa imbestigasyon ng Office of the Ombudsman.
Kaugnay ng mga reklamong plunder at graft laban kay Leviste at sa kanyang renewable energy company.
Ayon kay Remulla, naniniwala siyang babalik ang mag-ina sa bansa. Ngunit nagbabala siya na maaari silang humarap sa kaukulang legal na hakbang kung hindi sila uuwi.
“Baka gusto nilang umuwi na nakaposas ‘pag hindi sila, bumalik, hindi ba?” ani Remulla.
Samantala, nilinaw ni Senator Loren Legarda na ang kanyang pag-alis ng bansa ay bahagi ng nauna nang inaprubahang medical leave mula Agosto 3 hanggang 5, alinsunod sa mga patakaran ng Senado.
**
Lumabas sa paunang imbestigasyon ng National Capital Region Police Office (NCRPO) na intensiyonal na inabandona ng mga salaring nakasuot ng masks o takip sa mukha ang limang kabaong na nadiskubre sa iba’t ibang lugar sa Metro Manila nitong madaling araw ng Biyernes, Agosto 7.
Sa isang pahayag, kinumpirma rin ng NCRPO ang pagkakadiskubre ng mga ito sa Sta. Cruz Manila, Barangay 54 sa Caloocan City, Brgy. South Triangle sa Quezon City, Brgy. Sta Tereista sa Quezon City at sa Gil Puyat sa Makati City.
Ayon sa NCRPO, dalawang van na kulay puti at gray ang sinakyan ng mga salarin nang isagawa nila ang pag-abandona sa mga kabaong, na may mga nakalagay na mensaheng laban sa China at Communist Party of the Philippines – New People’s Army (CPP-NPA).
Kaugany nito, ipinag-utos na ni PNP chief Gen. Jose Melencio Naratez Jr. ang komprehensibong imbestigasyon sa pag-iwan ng mga naturang kabaong.
Sa ngayon, nagsasagawa na ang mga imbestigador ng NCRPO ng backtracking at forward tracking sa mga CCTV footages sa mga posibleng dinaanan ng mga salarin.